Баранавіцкі актывіст падаў у суд на дзяржаўную газету за “падман чытачоў”

Віктар Сырыца пакідае залу судовых паседжанняў. Фото Канстанціна Літвіна Баранавіцкі актывіст Віктар Сырыца імкнецца даказаць у судзе, што праз недакладную інфармацыю ў раённай гезеце “Наш край” яго несправядліва абвінавацілі ў арганізацыі несанкцыянаванага мерапрыемства.
Папярэдняе судовае паседжанне па заяве Віктара Сырыцы да баранавіцкай аб’яднанай газеты “Наш край”, сярод заснавальнікаў якой гарвыканкам і райвыканкам, прайшло ў судзе Баранавіцкага раёна і горада Баранавічы 26 ліпеня.   Віктар Сырыца распавёў на судзе, што 30 мая газета “Наш край” у раздзеле “Афіша” надрукавала аб’яву, у якой адзначалася, што 2 чэрвеня ў 12.30 у вёсцы Мілавіды адбудзецца мерапрыемства, прысвечанае 150-годдзю Мілавідскай бітвы.   “Зыходзячы з таго, што арт. 51 Канстытуцыі РБ абвяшчае права кожнага чалавека на ўдзел у культурным жыцці”, грамадскі актывіст арганізаваў аўтобус для аматараў гісторыі, якія жадалі паўдзельнічаць у анансаваным культурным мерапрыемстве.   Але ў азначаны час на месцы правядзення свята нікога не было! Сведкамі гэтаму сталі супрацоўнікі ДАІ. Па словах Сырыцы, пачакаўшы 30 хвілін, госці неадбыўшагася свята ўсклалі кветкі да помнікаў, праспявалі гімн “Магутны Божа” і пакінулі месца, дзе планавалася мерапрыемства.   Аднак 12 чэрвеня Сырыцу нечакана выклікалі ў Баранавіцкі РАУС на падпісанне адімністрацыйнага пратакола, у якім актывіст абвінавачваўся ў арганізацыі і правядзенні 2 чэрвеня несанкцыянаванага мерапрыемства ў памяць касінераў 1863 года.   Віктар Сырыца заявіў, што катэгарычна не згодны з пратаколам, таму што выступаў не як арганізатар несанкцыянаванай акцыі, а як удзельнік святочнага мерапрыемства, анансаванага афіцыйнай газетай органаў улады.   Ён папрасіў суд абавязаць рэдакцыю газеты “Наш край” папрасіць прабачэння ў сваіх чытачоў за падман жыхароў горада Баранавічы і Баранавіцкага раёна, спагнаць з газеты “Наш край” панесеныя ўдзельнікамі мерапрыемства страты, звязаныя з арэндай аўтобуса ў памеры 2,3 млн рублёў і вярнуць дзяржпошліну.   Галоўны рэдактар Міхаіл Шубіч, які прадстаўляў бок газеты “Наш край”, вінаватым сябе не прызнаў.   Ён растлумачыў, што тэкст афішы ў рэдакцыю даслала ўпраўленне культуры райвыканкама, таму рэдакцыя газеты не нясе адказнасці за яе змест. “Такія аб’явы друкуюцца як рэкламныя. Вы ж не будзеце звяртацца ў рэдакцыю, калі не адпавядае зместу аб’ява аб продажы, напрыклад, каровы?!” – аргументаваў рэдактар. На паседжанні ён прадаставіў тэкст афішы, дасланы аддзелам культуры для публікацыі.   Суд вырашыў назначыць паўторнае слуханне справы, прыцягнуўшы ў якасці суадказчыка аддзел культуры Баранавіцкага райвыканкама.   Наступнае судовае слуханне прызначана на 9 жніўня.
На эту же тему
На арганізатара Мілавідскага фэсту ў Баранавічах склалі трэці адміністрацыйны пратакол Барановичский прокурор вступился за организаторов «Мілавідскага фэста»