Карціна ў растэрміноўку (+фота)

Яшчэ адну карціну з дабрачыннай выставы купяць з выплатай сродкаў па частках

Твор Міколы Купавы "Гальшанскі замак" па меркаванні работнікаў музейнага комплексу Аршанчыны выдатна падыходзіць для пастаяннай экспазіцыі музея Уладзіміра Караткевіча. Гэтую карціну музейны комплекс і вырашыў набыць сумесна з аршанцамі і ўсімі хто зацікаулены у захаванні бызыльянскага манастыра. Канешне, 200 еўра-столькі каштуе карціна-установа культуры выплаціць адразу не будзе. Таму карціна будзе выкупацца з адтэрміноўкай. Пасля сканчэння экспанавання выставы ў Оршы, твор застанецца ў нашым горадзе, пяройдзе ў музей, побач жа з "Гальшанскім замкам" будзе стаяць скрыня ў якую наведвальнікі музею змогуць ахвяраваць свае грошы, каб у далейшым разлічыцца з Міколам Купавам. Такая скрыня ўстаноўленая ўжо зараз.

Уваход на выставу вольны. Грошы за наведванне дабрачыннай выставы музейныя работнікі не бяруць, але просяць наведвальнікаў ахвяраваць сродкі на набыцце карціны "Гальшанскі замак"

Нагадаем, што за час экспанавання дабрачыннай выставы фонды музейнага комплекса папоўніліся ўжо трыма карцінамі. Адну карціну "Фальварак Вязынка" падарыў сам мастак, карціну "Вялікі гетман Канстанцін Астрожскі" прэзэнтаваў невядомы мецэнат і ўчора Андрэй Дзмітрыеў, Юрась Губарэвіч і Леанід Аўтухоў падарылі музею Караткевіча карціну “Там спрадвеку гучыць мая мова, булатны клінок…”.

Нагадаем, што дабрачынная выстава працягнецца ў музеі гісторыі і культуры Аршаншчыны да 31 ліпеня. Любы чалавек можа набыць упадабаны твор, палова выручаных сродкаў будзе перададзеная на рэстаўрацыю помніка архітэктуры "былы базылянскі манастыр".

На фота: карціна "Гальшанскі замак", якую набудзе музейны комплекс у растэрміноўку

На фота: карціна падараваная музейнаму комплексу Міколам Купавай

На фота: карціна набытая невядомым мецэнатам

На фота: карціна падораная музею Караткевіча палітыкамі