Ці знойдуцца сродкі на рэстаўрацыю манастыроў?

Так запісана ў “Праграме захавання гісторыка-культурнай спадчыны горада Орша на 2011 - 2015 гады”, зацверджанай у канцы мінулага года рашэннем Аршанскага гарсавета і нядаўна апублікаванай. Гэтымі аб”ектамі, што патрабуюць рэстаўрацыі, з”яўляюцца корпус былога кляштара францысканаў, былы манастыр базылянаў і Куцеінскі манастыр.

Будынкі помнікаў архітэктуры XVII і XVIII стагоддзяў знаходзяцца ў заняпадзе. Зараз яны належаць аднаму ўладальніку - Віцебскай епархіі Беларускай праваслаўнай царквы.

Згодна з дадаткам да “Праграмы” гарсавет прадугледзеў наступнае забяспячэнне рэсурсамі мерапрыемстваў: на правядзенне экспедыцый па выяўленню матэрыяльных і нематэрыяльных каштоўнасцей, якія павінен арганізаваць аддзел культуры гарвыканкама Оршы, з бюджэту горада выдаткуецца па 500 000 рублеў (каля 60 даляраў) на 2011 і 2013 гады; на правядзенне мерапрыемстваў па папулярызацыі гісторыка-культурнай спадчыны -   па 1 000 000 рублёў (каля 120 даляраў) на 2011 і 2015 гады.

Што тычыцца рэстаўрацыйных працаў па аднаўленню аб’ектаў гісторыка-культурнай спадчыны, то імі павінны займацца ўладальнікі на ўласныя сродкі. Адкуль, цікава, у Віцебскай епархіі, якая апошнія дзесяць гадоў накіроўвала свае асноўныя высілкі на аднаўленне двух велічных храмаў у цэнтры Віцебска, знойдуцца сродкі на рэстаўрацыю адразу трох манастыроў, ад двух з якіх засталіся толькі муры?

Вядома, што ў мінулым годзе аршанскія уніяты пачалі збор подпісаў за перадачу гісторыка-культурнага помніка -  будынка былога базылянскага манастыра -  у маёмасць Беларускай грэка-каталіцкай царквы. Праўда, ці здольная грэка-каталіцкая абшчына Оршы знайсці сродкі на аднаўленне будынка, таксама пытанне…