"Народны рэферэндум" у Оршы (+фота, +відэа)

Палітычныя лідары арганізацый, якія ініцыявалі "Народны рэферэндум", наведалі Оршу

Чатыры палітычныя арганізацыі вясной абвесцілі пра будучае правядзенне "Народнага рэферэндуму". Учора прадстаўнікі трох з чатырох палітычных суб'ектаў - ініцыятараў наведалі наш горад.

Партыю БНФ прадстаўляў абласны кіраўнік Леанід Аўтухоў, рух "За свабоду" Юрась Губарэвіч (інтэрв'ю з ім чытайце бліжэйшым часе на нашым сайце), кампанію "Гавары праўду" прадстаўляў адзін з яе лідараў Андрэй Дзмітрыеў, не было толькі прадстаўнікоў БСДП (Г). З самай раніцы палітычныя лідары наведалі прыдняпроўскі парк, дзе ўсклалі кветкі да помніка Уладзіміру Караткевічу, пасля чаго скіраваліся ў райвыканкам. У выканкаме госці горада перадалі больш за 70 подпісаў гараджанаў з просьбай як мага хутчэй распачаць рамонт маста праз Днепр і мелі сустрэчу з намеснікам старшыні гарвыканкаму Іванам Хурбатавым. Як распавёў адзін з удзельнікаў сустрэчы Алесь Шутаў па выніках сустрэчы: "на шчасце ўлады аб'ектыўна ацэньваюць стан праблемы, небяспеку, якая існуе, і гатовыя вырашаць дадзеную праблему".

Наступная сустрэча якую правялі палітыкі адбылася на гарадскім рынку. Прадпрымальнікі распавядалі не толькі пра свае праблемы, але і выказвалі пытанні за якія яны гатовы былі б прагаласаваць на магчымым у будучым рэферэндуме. Адна з важнейшых праблемаў, якую агучвалі жанчыны-прадпрымальнікі (а жанчын сабралося большасць) - гэта сацыяльная неабароненасць. Пры тым, што малы бізнэс шмат плоціць падаткаў і сацыяльных выплатаў, самі яны пры выхадзе на пенсію атрымліваюць мінімальныя грошы за свой працоўны стаж.

У пасляабедзены час госці завіталі ў краязнаўчы музей, дзе зараз экспануецца дабрачынная выстава Міколы Купавы. Як паведамляў раней наш сайт, любы чалавек можа набыць выстаўленыя карціны, а значная частка выручаных сродкаў ад продажу карцінаў пойдзе на рэстаўрацыю былога Базылянскага манастыра. Магчымасцю дапамагчы рэстаўрацыі гісторыка-культурнаму помніку скарысталіся і госці. Яны купілі карціну "Там спрадвеку гучыць мая мова булатны клінок. Паводле Уладзіміра Караткевіча", якую тут жа падарылі музею Уладзіміра Караткевіча. Андрэй Дзмітрыеў пры гэтым сказаў: "Мы госці вашага горада і хочам зрабіць і карысці і падарунак. Нашыя ахвяраванні на рэстаўрацыю - гэта карысць. Карціна музею - гэта падарунак вашаму гораду".

Далейшую частку візіту з ускладаннем кветак на помнік ахвярам сталінскіх рэпрэсій на Кабыляцкай гары і сустрэчай з мясцовым актывам дэмакратычных сілаў вы можаце пабачыць у нашым фотарэпартажы і выступе Юрася Губарэвіча на сустрэчы з актывам дэмакратычных арганізацый.

На фота з лева на права: Канстанцін Анташкевіч (былы кандыдат у дэпутаты парламенту), Андрэй Дзмітрыеў (адзін з лідараў "Гавары праўду"), Алесь Шутаў (адзін з кіраўнікоў Аршанскай каімпаніі "Гавары праўду" і Партыі БНФ), Юрась Губарэвіч (першы намеснік старшыні руху "За свабоду"), Юрый Нагорны (былы мэр г. Барань), Леанід Аўтухоў (старшыня абласной арганізацыі БНФ)

На фота: пад час ускладання кветак да помніку Караткевіча

На фота: пасля ўскладання кветак

На фота: на рынку (прадпрымальнікі прасілі не публікаваць фота з удзельнікамі сустрэчы)

На фота: абмеркаванне набыцця карціны

На фота: перадача купленай карціны дырэктарцы музея Караткевіча

На фота: Андрэй Дзмітрыеў дадаткова ахвяруе грошы на набыццё іншых карцінаў

На фота: карціна, якую палітычныя лідары набылі і падарылі музею Караткевіча

На фота: ускладанне кветак да помніка ахвярам сталінскіх рэпрэсій

На фота: ускладанне кветак

На фота: помнік пасля ускладання кветак

На фота: сустрэча з актывістамі дэмакратычных арганізацый

На відэа: адказ Юрася Губарэвіча на пытанне Міная Карніенка "што за звер - рэферэндум?"