Меньш зарабляем і выміраем

Белстат апублікаваў дадзеныя развіцця рэгіёнаў за першы квартал 2012 года.

Лічбы сацыяльна-эканамічнага развіцця прыводзяцца па шмат якіх катэгорыях. На нашым сайце мы прывядзем толькі асобныя, найбольш яскравыя дадзеныя, якія характарызуюць сітуацыю ў г. Орша, Аршанскім, Талачынскім і Дубровеньскім раёнах

Адносна такога ж перыяду (студзень - люты) мінулага году зарабляць мы сталі крыху меньш. Так у горадзе Орша сярэдні заробак у гэтым годзе склаў 2.553.100, што складае 99% ад заробкаў у такі ж перыяд мінулага году. У Дубровеньскім раёне заробак знізіўся на тры адсоткі (97% ад мінулагодняга заробку за той жа перыяд) і склаў 2.129.800. Найбольшае падзенне адбылося ў Талачынскім раёне - 2.249.600, што кладае 93,2% адносна мінулага году. Варта падкрэсліць, што заробкі прыведзеныя у беларускіх рублях, а гэта значыць, што адносна даляравага эквіваленту аршанцы пабеднелі больш значна. Бо курс беларускага рубля за мінулы год перажыў рэкордную для ўсяго свету разавую дэвальвацыю. Акрамя таго, у краіне значнымі тэмпамі растуць кошты, што таксама зніжае нашыя рэальныя даходы.

Аб'ём выпуску прамысловых тавараў з аглядаемых намі раёнаў не ўпаў толькі ў Оршы. Замест падзення тут назіраецца рост адносна таго ж перыяду мінулага году - 110,6%. У астатніх адміністратыўных адзінках назіраецца падзенне. Талачынскі раён - 85,7%, Аршанскі раён - 99,3%. У агульнаабласным аб'ёме доля Оршы у вытворчасці прадукцыі складае ўсяго толькі - 3%, Аршанскага раёна - 1,2%, а Талачынскі раён - 0,4%. Такая сітуацыя складаецца з-за значнай долі нафтаперапрацоўчай галіны ў Віцебскай вобласці. Наваполацк у долі абласной вытворчасці займае - 67,3%.

У аглядаемы перыяд у горадзе вырас і экспарт. Сальда экспарт/імпарт у горадзе склала +2.227.300 даляраў. Не значны рост з'явіўся і ў Дуьровеньскім раёне - 96.700 даляраў. Астатнія ж адзінкі наадварот гандлявалі з замежжам і мінус (больш куплялі чым прадавалі). Талачынскі раён - мінус 832.000 даляраў, Аршанскі раён - мінус 8.185.200 даляраў. Але адносна мінулага году ўсё адно экспарт змяншаецца, а імпарт расце ва ўсіх раёнах акрамя Талачынскага, дзе была адваротная тэндэнцыя.

Прамыя замежныя інвестыцыі мелі месца толькі ў г. Орша і Аршанскім раёне. У Оршы ўдалося атрымаць з замежжа 305.100 даляраў. У аршанскім раёне ўсяго толькі 100.000 даляраў.

На гэтым не дужа радасным эканамічным фоне ідзе і скарачэнне насельніцтва. Натуральным чынам насельніцтва скарацілася ў горадзе на 128 чалавек, Аршанскім раёне на 62 чалавекі, Талачынскім - 80, Дубровеньскім - 24 чалавекі. Пры гэтым у дадзенай статыстыцы разглядаецца толькі суадносіны нараджальнасць/смяротнасць, то бок мігнрацыя насельнітва не ўлічваецца. Хаця за мінулы і гэты год шмат аршанцаў пераехалі на працу ў Расійскую Федэрацыю. Акрамя Масквы і Санкт-Пецярбургу папулярным кірункам працоўнай міграцыі стаў і Смаленск, дзе заробкі таксама значна большыя чым у Оршы.