Вышэйшы гаспадарчы суд адмовіў Логвінаву ў ягонай спробе вярнуць выдавецкую ліцэнзію

Вышэйшы гаспадарчы суд адмовіў Логвінаву ў ягонай спробе вярнуць выдавецкую ліцэнзію
Для Логвінава страта ліцэнзіі была балючым сюрпрызам./ Фота NN.BY Дзясяткі пісьменнікаў прыйшлі падтрымаць Логвінава ў суд з Міністэрствам інфармацыі. У Вышэйшым гаспадарчым судзе адбыўся разгляд справы па пазове выдавецтва «Логвінаў» да Міністэрства інфармацыі. Мінінфа забрала ў выдаўца ліцэнзію, падставай для чаго стала выданне альбома "Прэс-фота Беларусі-2011", які вясной 2013 года ашмянскі суд прызнаў экстрэмісцкім. лія Дарашкевіч была адной з укладальніц альбома, за які Логвінаў страціў ліцэнзію.   Журналістаў з фота- і відэакамерамі ў залу паседжанняў суда не пусціла ахова пад камандаваннем невядомага мужчыны ў цывільным, які адмовіўся назваць сябе і сваю пасаду.   Падтрымаць Ігара Логвінава прыйшлі выдатныя дзеячы грамадства і культуры Уладзімір Арлоў, Альгерд Бахарэвіч, Ігар Бабкоў, Вольга Шпарага, Павал Касцюкевіч. Логвінава прыйшлі падтрымаць пісьменнік Уладзімір Арлоў (злева) і юрыст Андрэй Бастунец (справа).   «Справа, якая разглядаецца сёння, не руцінная і не шараговая, -- сказаў у судзе пісьменнік Уладзімір Арлоў. -- Гаворка ідзе пра лёс аўтарытэтнага выдавецтва. Яно працуе чатырнаццаты год. За гэты час выйшла каля 700 кніг. Выдавецтва з'яўляецца адным з лідараў па выданні мастацкай літаратуры па беларускай мове. Высокі суд, -- звярнуўся ён да суддзі, -- вашае рашэнне, якое дазволіла б працягваць выдавецтву сваю працу, было б адначасова і рашэннем у падтрымку нашай беларускай культуры».   Справу разглядала суддзя Таццяна Праташчык.
Інтарэсы Міністэрства інфармацыі ў судзе баранілі дзве спецыялісткі з юрыдычнай службы.   Суддзя адмовіла выдаўцу ў ягоным пазове. "Наша Ніва"