Знойдзены пад Оршай ровар можа стаць музейным экспанатам

Ровар першай роварнай фабрыкі "Россия", знойдзены пад Оршай, можа стаць экспанатам унікальнага музею.

Калекцыянер і даследчык Андрэй Мяціеў мае больш за 150 тысяч унікальных старых ровараў і аксэсуараў, якія пакуль захоўваюцца ў адрынах і гаражох. У калекцыянера ёсць задума зрабіць унікальны музей. Адзін з экспанатаў Мяціеў знайшоў у... зруйнаванай сядзібе пад Оршай.

Здарылася гэта так. Аднойчы на трамвайным прыпынку ў Маскве Мяціеў завёў размову са старым чалавекам. І нечакана даведаўся пра рарытэтны ровар. Вось, што кажа сам калекцыянер:

"Старык распавёў мне пра рускага афіцэра Рыгора, які загінуў пры штурме Екацярынадара ў 1918 годзе. Да першай сусветнай вайны ён вучыўся ў Пецярбургскім універсітэце, захапляўся веласпортам і коўзанкамі, а таксама паляваннем. Шмат удзельнічаў у розных гонках, быў чальцом таварыства раварыстаў-аматараў, ездзіў на ровары маркі "Россия". У 1917 годзе ён прыехаў да бацькоў у сядзібу пад Оршай, дзе закапаў у прыбудове сямейныя рэліквіі, у тым ліку і ровар. Праз год ён загінуў на Доне, калі ваяваў у добраахвотніцкай арміі. Старык, як выявілася, асабіста ведаў афіцэра.

Я ўзяў ровар і сеў з ім у цягнік да Оршы. Я разумеў, што мае шанцы знайсці рарытэтную "Россию" вельмі малыя. Атрымалася, што сядзіба была зруйнавана яшчэ падчас вайны, а прыбудову не так даўно знеслі. Я зусіў паў духам, але задаў пытанне, ці не было чагосьці незвычайнага, калі прыбудову зносілі. Мне адказалі: "Як жа не было! Скарб знайшлі!" Пра скарб гэты мне ніхто нічога канкрэтнага не сказаў, параілі звярнуцца да брыгадзіра экскаватаршчыкаў. Яшчэ дзень напружанага пошуку, і раптам "кампетэнтны адказ": "Хіба гэта скарб? Пяць ружжаў прыгожых, але ні да чаго не прыдатных, ды ровар іржавы". — "А ровар дзе?" — "У бур'яне ляжыць, ідзі ды бяры". Так у маёй калекцыі з'явіўся ровар першай рускай роварнай фабрыкі "Россия".

Пакуль Музей ровараў у Маскве яшчэ не створаны, Андрэй Мяціеў удзельнічае ў розных выставах. Але ад плану стварыць музей не адмаўляецца.