Байкот поўны ці палавінчаты

На выходных прайшоў сход аршанскіх сябраў Партыі БНФ

У суботу горад наведаў намеснік старшыні Партыі БНФ Алесь Стральцоў. Ён сустрэўся з сябрамі Партыі і ахвотнымі ўступіць у партыю жыхарамі гораду Орша.

На сустрэчы абмяркоўваліся бліжэйшыя тактычныя планы Фронту. У прыватнасці намеснік старшыні паведаміў, што бліжэйшым часам арганізацыя плануе запусціць дзве значныя гарамдскія кампаніі. Першая кампанія будзе скіраваная супраць карупцыі ў краіне, якая па некаторых даследваннях з кожным годам узрастае. Пры гэтым адмысловыя службы, якія мусяць змагацца з хабарніцтвам проста не спраўляюцца са сваёй работай. Партыйная кампанія скіравана ў тым ліку і на тое, каб паспрыяць працы дадзеных службаў. Асноўная ж задача кампаніі давесці самім грамадзянам, што не варта ўдзельнічаць у карупцыйных схемах.

Другая кампанія, што можа распачацца ў бліжэйшы час скіравана на спыненне продажу дзяржаўнай зямлі ў прыватныя рукі. На дадзеных партыйцаў сёння ў краіне праз шэрыя схемы масава пачаўся распродаж зямлі. Інфармацыя пра такія продажы да грамадства даходзіць мізерная, бо часцей за ўсё зямлю скупляюць набліжаныя да чыноўнікаў людзі.

Не абмінулі ўвагай і пытанне надыходзячых у гэтым годзе парламенцкіх выбараў. Кіраўніцтва ПБНФ схільнае да таго, каб вылучыць сваіх кандыдатаў для ўдзелу ў выбарах, каб выкарыстаць магчымасці агітацыі, але кал да моманту галасавання не будуць вызваленыя палітычныя вязні, а ў камісіі не ўвойдзе дастатковая для забеспячэння празрыстасці падліку галасоў колькасць партыйных прадстаўнікоў, то зняць кандыдатаў. Аршанскія сябры ПБНФ чарговы раз паведамілі, што не хацелі б, нават у такім выглядзе, удзельнічаць у бліжэйшых выбарах і з'яўляюцца прыхільнікамі правядзення кампаніі "Актыўнага байкоту", то бок, не проста не ўдзельнічаць у выбарах, але і заклікаць грамадзянаў не прыходзіць на выбарчыя ўчасткі.