Аліна Талай: наш колер — бел-чырвона-белы

Лепшая прадстаўніца жаночай лёгкай атлетыкі ў нашай краіне Аліна Талай лічыць, што сапраўдным сцягам Беларусі з'яўляецца гістарычны бел-чырвона-белы, а Каліноўскага і Вітаўта бачыць героямі Радзімы.

Аліна Талай дала інтэрв'ю газеце "Прессбол", у якім распавяла пра сваю лёгкаатлетычную кар'еру, поспехі ў вучобе, мужчынах і Беларусі. На пытанне пра любімага гістарычнага персанажа Талай адказала так:

Вітаўт. Надзвычай разумны і хітры палітык, пры якім ВКЛ сапраўды дасягло нечуванага росквіту. Проста дзіўна, колькі паходаў здзейсніла ягонае войска, у колькіх бітвах прыняло ўдзел, колькі саюзаў было заключана для ўзмацнення пазіцый Вялікага Княства ў Еўропе. І яго сапраўды паважалі, як паважаюць моцнага і разумнага.

Выключна станоўча стаўлюся да ідэі ўсталяваць у Мінску помнік Станіславу Манюшку. Я бы і Кастусю Каліноўскаму помнік паставіла. Здаецца, мы паступова вяртаемся да вытокаў сваёй дзяржаўнасці. Мяркую, што вуліцы, названыя імёнамі рознага чыну партыйных дзеячаў, з часам будуць знікаць з мапаў былых краін СССР. Да прыкладу, не магу зразумець, чаму адна з цэнтральных плошчаў сталіцы Беларусі носіць імя Калініна — усесаюзнага старасты, зрабіўшага кар'еру пры Сталіне і прымаўшым удзел у рэпрэсіях супраць беларускага народу. Каля яго помніку праязджаюць практычна ўсе госці Мінска — я думаю, гэта не лепшая рэклама сталіцы.

Вядома, я вырасла пад чырвона-зялёным сцягам і мне падабаецца, калі ён узнімаецца ў мой гонар, але ўсё ж такі давайце не будзем падманваць адно аднаго — наш колер бел-чырвона-белы. Куды падзець гісторыю дзяржавы да 1917 года? Трэба забыцца на тое, што нашы прадзеды вякамі лілі сваю кроў за волю Бацькаўшчыны? Якая нам тады будзе цана — Іванам, што не памятаюць пра свой род?

Калі б давала інтэрв'ю па-беларуску, то калі-некалі падбірала б патрэбныя словы. Апошні раз размаўляла па-беларуску ў школе, цяпер у мяне такой практыкі няма. Не хаваю, хацелася б яе мець, усё-ткі родная мова.