Усё гэта, хутчэй, зьвязанае з палітыкай...

Як мы перадавалі ўжо, Ўкраіна забараніла ўвоз на сваю тэрыторыю малочнай прадукцыі трох  беларускіх прадпрыемстваў: Аршанскага малочнага камбінату, Магілёўскага «Бабушкина крынка», Гомельскага «Молочные продукты».  Прычына - парушэньне санітарных нормаў.

На Аршанскім малочным камбінаце мяркуюць, што прычынай сталася ня якасьць прадукцыі, а палітычныя няўвязкі ў адносінах паміж Украінай і Беларусьсю. Таму ніякіх намаганьняў, каб палепшыць якасьць прадукцыі, на прадпрыемстве рабіць не зьбіраюцца, паведаміў у прэссе кіраўнік аддзелу збыту камбінату Канстанцін Чахоўскі:

«У нас нічога не зьмянілася. Усё гэта, хутчэй за ўсё, зьвязанае з палітыкай. Я ў гэтым практычна ўпэўнены, бо ў нас прадукцыя дастаткова высокай якасьці. Ніколі ніякіх пытаньняў не ўзьнікала. Калі дробныя нейкія пытаньні, то яны вырашаліся, але гэта вельмі дробныя, нязначныя. А каб такое, што з антыбіётыкамі зьвязана, то гэта трызьненьне проста. Мы пастаўляем і ў Расею, і ў Казахстан — усюды гэта правяраецца, і ніякіх пытаньняў не ўзьнікае. Дагэтуль былі пастаўкі і ўсё было добра, а тут раптам адначасна стала дрэнна — ну так жа не бывае. Пэўна, нейкія палітычныя матывы. Я, калі папраўдзе, за палітычным жыцьцём Украіны не сачу, бо гэта вялікая вёска, дзе няведама што творыцца. Але ў нас не такія ўжо вялікія аб’ёмы з Украінай і былі, каб для нас гэта было адчувальна. Мы ўвогуле гэта не адчулі».

Даведка: На Аршанскім малочным камбінаце ў год перапрацоўваецца каля 65 тысяч тон малака. Выпускаецца больш 50 найменаваньняў прадукцыі – малочныя прадукты, сыры, тварог, ёгурт і інш.

Прадпрыемства экспартуе сваю прадукцыю ў Германію, Польшчу, Азербайджан, Казахстан, Расію.