ФК "Орша". Сезон скончыўся, а што далей?

Як прайшоў сезон 2012 года для футбольнага клуба “Орша”? Што чакае нашу каманду ў наступным чэмпіянаце 2-й лігі? Сайт orsha.eu вырашыў падвесці невялічкія вынікі і разабрацца, што адбываецца ў камандзе.

Перад пачаткам чэмпіянату шмат гаварылася пра складаную фінансавую сітуацыю ў камандзе. Наша каманда і фінансавыя праблемы – гэтыя словазлучэнні сталі сінонімамі, аднак не трэба забываць і пра тое, што такія праблемы адчуваюць многія клубы са ўсіх рэгіёнаў Беларусі. Пры гэтым многія з іх выступаюць лепш за “Оршу”. Дзесьці значэнне мае падбор футбалістаў, а дзесьці іх самаадданасць на полі. У гэтым годзе звыклых праблем з фінансамі і выездамі на матчы ў іншыя гарады ўжо не было.

Напярэдадні сезону ў камандзе адбылася перастаноўка на пасадзе галоўнага трэнера – Ўладзімір Правалінскі быў адхілены ад пасады хутчэй не за вынікі каманды (умовы для падрыхтоўкі каманды былі занадта слабыя), а верагодней ўсяго за тое, што адкрыта гаварыў пра праблемы ў СМІ. Шчырасць Правалінскага не спадабалася кіраўніцтву горада, і трэнер быў прызначаны новы – экс-брамнік “Оршы”, а ў апошнія гады дзіцячы трэнер Аляксандр Ладзяны.

У каманды палепшыліся ўмовы, затрымак па зарплаце ні ў адным з месяцаў не было, аднак каманда зноў правалілася – з 19-ці клубаў аршанцы фінішавалі толькі на 17-м месцы. Высновы напрошваюцца самі: па-першае, трэнерскаму штабу не ўдалося наладзіць гульню каманды і дамагчыся прымальнага выніку (пры тым, што размова аб выхадзе ў 1-ю лігу не вялася), па-другое, з дзейным падборам футбалістаў складана дамагчыся поспеху, бо многія з іх працуюць яшчэ як мінімум у адным месцы, да таго ж на трэніроўкі не трацяць усіх сілаў. Так што няхай крыўдуе хто хоча, але вынік “Оршы” пры любых варыянтах ганебны.

Відавочна, што для дасягнення поспеху “Оршы” трэба ўзмацняцца. На дадзены момант у горадзе няма дастатковай колькасці футбалістаў высокага ўзроўню, таму трэба шукаць іх у іншых гарадах і клубах, і прапаноўваць ім неблагія ўмовы для трэніровак і гульняў.

Трэнеры і футбалісты адказваюць на пытанне пра будучыню аднолькава – “пажывем, і ўвесну пабачым”. Ніякай вызначанасці з бюджэтам клуба на наступны сезон няма. Без акрэсленага бюджэту, без разумення, хто будзе абараняць сіня-белыя колеры нашай каманды нельга ставіць і задачы. Калі мэта на сезон будзе вызначана, можа быць ужо позна, бо для падрыхтоўкі клуба да чэмпіянату вельмі важна карысна правесці перадсезонку, пажадана выехаць кудысьці на зборы, а з гэтым у “Оршы” традыцыйна ёсць праблемы.

Пасля заканчэння чэмпіянату наша каманда яшчэ працягвала трэніроўкі. Пачалася зіма, а некаторыя футбалісты будуць падтрымліваць форму на чэмпіянаце горада па міні-футболе. Што будзе наперадзе, невядома.

Пажывем-пабачым?