73 гады таму гітлераўская Германія напала на СССР

Нямецкі вайсковец з гербам БССР, лакаматыўнае дэпо, Баранавічы, 1941 год
У Беларусі дасюль падаюць 22 чэрвеня 1941 года, як пачатак вялікай трагедыі, забываючы, што распачалася яна яшчэ 1 верасня 1939 года. Чаму ж тады ў нас не любяць згадваць сапраўдны пачатак Другой сусветнай вайны? Відаць таму, што дасюль дзяржавай шануецца савецкая гісторыя.  Ніхто не хоча згадваць, што СССР увайшоў у Другую Сусветную вайну як хаўруснік Германіі – неспадзявана ўдарыўшы ў спіну Польшчы, якая 17 дзён адна змагалася з фашыстамі.   Так, у выніку “вызваленчага паходу Чырвонай арміі”  Беларусь нарэшце ўз’ядналася ў адзіную краіну, але такое аб’яднанне ні да чаго добрага не прывяло. Вельмі шмат беларусаў, палякаў і жыдоў было арыштавана Савецкай уладай і згінула ў Курапатах, Катыні ці Далёкім Усходзе. Дый для самой бальшавіцкай дзяржавы такое пашырэнне граніцы было трагічным – згубіўшы “буферную“ Польшчу СССР пачаў межаваць на прамую з гітлераўскай Германіяй.   Такое суседства і дазволіла пазней немцам нанесці ашаламляльны і нечаканы ўдар па Савецкім Саюзе 22 чэрвеня 1941 года. У гэты дзень і на працягу двух наступных наш горад  бамбілі нямецкія самалёты. А 26 чэрвеня 2-я нямецкая танкавая група праехала праз Баранавічы. За ёю ў горад увайшлі вайсковыя фармаванні гітлераўцаў, каб прабыць тут да 8 ліпеня 1944 года.  Паштовая картка палонага польскага жаўнера ў Баранавічы, 1940 год   Аднак для Баранавіч бамбаванне 22 чэрвеня не было першым – горад ужо ведаў што такое нямецкія бомбы. 15 верасня 1939 года нямецкія самалёты скідалі бомбы на горад – знішчылі цягнікі, пашкодзілі чыгунку, спрабавалі разбамбіць радыёстанцыю.  Ужо тады ў нас было шмат забітых і параненых людзей. Шмат забытых выхадцаў з Баранавіч было прызвана ў польскую армію і загінула пад час баёў. Яшчэ больш  трапіла ў нямецкі палон і да 1941 года, дзякуючы Чырвонаму Крыжу, дасылала дахаты паштоўкі і лісты.   22 чэрвеня гэта трагічная дата, якой магло б і не быць, калі б СССР за два гады да таго дапамог Польшчы ў змаганні з фашызмам, якія толькі пачынаў уздымаць галаву.  Наколькі б было менш ахвяраў і разбурэнняў той вайны? Колькі б людзей ва ўсім свеце засталося б жывымі?     15.09.1939, Бліжэй да левага ніжняга краю здымка відаць радыёвежа. Здымак выкананы пілотам Luftwaffe падчас бамбёжкі Баранавіч (cа збораў Генрыха Беразоўскага, Польшча)