Каліноўскі і Будзіловіч узгаданыя (+відэа)

На адным з грамадскіх памяшканняў сабралося каля 20 чалавек, якія вырашылі ўзгадаць пра паўстанне, 150-я гадавіна якога адзначаецца ў гэтым годзе.

Першым перад прысутнымі выступіў былы мэр горада Барань, а сёння старшыня Таварыства Беларускай мовы імя Францішка Скарыны на Аршаншчыне Юрый Нагорны. Сваю прамову ён пачаў са словаў, якія Кастусь Каліноўскі ў свой час адрасаваў усяму беларускаму народу. Праз колькі фразаў Юрый Аляксандаравіч перадаў слова краязнаўцу Юрыю Копціку. Юрый распавёў пра паўстанне на Аршаншчыне, пра тое як яно было арганізавана і якія пакаранні яго ўдзельнікі потым атрымалі ў выніку разгрому паўстання. Значную частку свайго выступу Юрый пасвяціў пытанню стаўлення розных уладаў да паўстання. Паводле словаў Копціка да 1905 года да паўстання ставіліся адназначна кепска і таму не было сур'ёзных гістарычных работаў на гэтую тэму. У 1905 да яго пачалі ставіцца нейтральна - па сутнасці спрабавалі забыць, бо яно было антырасійскім. А пасля рэвалюцыі 1917 года тэма паўстання і асоба Каліноўскага стала зноўз актуальная. У прыватнасці Юрый прывёў зафіксаваны прыклад, калі ксёндз у сёняшнім Сененскім раёне(у часы паміж рэвалюцыяй 1905 і 1917) пайшоў збіраць сродкі на адну са сваіх ідэяў сярод сялянаў, яму ў адказ казалі: "А што, новае паўстанне рыхтуееца, бо мінулы раз ксёндз іншы хадзіў на паўстанне грошы збіраць?"

Наступным па чарзе выступіў Ігар Казмерчак, які распавёў пра аднаго з камандзіраў паўстання на Аршаншчыне Ігната Будзловіча. Калі Каліноўскі быў павешаны ў 25 год, то Ігнат Будзіловіч быў растраляны ў 22 гады ў Аршанскай турме - на той час Езуіцкім калегіюме, сёння гарадской галерэі. Косткі яго да гэтае пары знаходзяца на тэрыторыі таго былога комплексу.

Пасля краязнаўчых выступаў адбыўся маленькі канцэрт у тры песні Андрэя МЕльнікава. Андрэй праспяваў песні датычныя паўстанцаў. У асноўным ён спяваў песні, якія былі перакладзеныя ў свой час з ншых моваў Рэчы Паспалітай, якую і хацелі аднавіць паўстанцы. Пры гэтым, тэксты песень былі вялікія і цяжка запамінальныя, як сказаў сам выканаўца. Менавіта таму на відэа яго вочы часта апушчаныя да лісткоў з тэкстамі.