Кніжныя навінкі з Паазер’я

Выданнем кнігі Яніны Якубянец-Чаркоўскай “Паўстанне 1863 года ў Свянцянскім павеце”, тэкст якой з выдання 1934 года пераклаў з польскай мовы вядомы краязнаўца і выдавец з Пастаўшчыны Міхал Гіль, была ўшанавана памяць аб земляках, якія 150 гадоў таму назад прынялі ўдзел у антырасійскім паўстанні ў нашым краі. У тэрыторыю тагачаснага Свянцянскага ўезда (павета) ўваходзілі землі не толькі сучаснай Літвы, але і значныя часткі цяперашніх Пастаўскага раёна Віцебскай вобласці (Камайшчына, Лынтупшчына), Мядзельскага раёна Мінскай вобласці (Свіршчына, Шэметава і наваколле), Астравецкага і Смаргонскага раёнаў Гродзенскай вобласці (Жэлядзь, Вішнева, Кямелішкі і наваколле), таму гэта кніга будзе вельмі цікавай для краязнаўцаў і тым хто цікавіцца беларускай гісторыяй. Кніга выдадзена невялікім накладам у 200 асобнікаў. Большасць накладу будзе перададзена ў бібліятэкі рэгіёна, а таксама краязнаўцам.

Яшчэ варта адзначыць выхад трох цікавых кніг таксама краязнаўча-гістарычнай тэматыкі, якія спадзяёмся будуць вельмі цікавыя не толькі краязнаўцам, але і людзям мастацтва. Гэта кніга Отана Гедэмана “Граф Мануцы”, пра вядомага авантурыста-выхадца з Італіі, які напрыканцы 18 стагоддзя па волі лёсу апынуўся на Браслаўшчыне і які тэрарызаваў мясцовае насельніцтва. Пераклад кнігі з польскай мовы таксама здзейсніў Міхал Гіль. Трэба адзначыць, што гэта ўжо пятая кніга Отана Гедэмана, якая была перакладзена і выдадзена ў Паставах.

Вельмі цікавымі і карыснымі для краязнаўцаў, людзей звязаных з мастацтвам і нават простых чытачоў будуць кнігі Івана Драўніцкага “Мастакі з дынастыі Ромераў” і “Тутэйшая”. У першай даволі падрабязна распавядаецца пра жыццёвы шлях знакамітага беларуска-польска-літоўскага мастака Альфрэда Ізыдора Ромера, які значную частку свайго жыцця пражыў у сваім родавым маёнтку Каралінова, што на Пастаўшчыне, а таксама пра яго дзядоў, бацькоў, і сваякоў, якія сваё жыццё таксама звязалі з мастацтвам. Кніга “Тутэйшая” распавядае пра жыццё і творчасць вядомай віленскай журналісткі і літаратара міжваеннага перыяду Гелены Ромер-Ахенкоўскай, дочкі Альфрэда Ромера.

Міхал Гіль