Поставские умники вернулись с областного этапа школьных олимпиад с 9 дипломами

З 9 дыпломамі вярнулася з трэцяга, абласнога, этапа рэспубліканскай прадметнай алімпіяды сярод школьнікаў зборная каманда вучняў нашага раёна. Пераважную большасць яе ўдзельнікаў складалі 11-класнікі, а сярод іх канкурэнцыя заўсёды бывае вельмі жорсткай. Не стаў выключэннем і гэты год. Тым не менш пастаўчане не падкачалі і амаль усе занялі месцы ў першай дваццатцы.

Як адзначыла намеснік начальніка раённага аддзела адукацыі Л. К. Грачанік, вельмі парадавалі знаўцы беларускай мовы і літаратуры. Усе тры нашы дзяўчыны па гэтым прадмеце атрымалі дыпломы. Так, дыплома першай ступені ўдастоена вучаніца 11 класа СШ №2 Ганна Пракаповіч (настаўніца — Т. М. Захарэвіч). Дыплом другой ступені ў 11-класніцы Надзеі Дзямідка з СШ №1 (настаўніца — Л. І. Міхневіч), трэцяй ступені — у яе равесніцы з Гуцкай СШ Юліі Казаровец (настаўніца — С. П. Казаровец). Па рускай мове і літаратуры вызначылася 10-класніца Пастаўскай гімназіі Кацярына Сушко (настаўніца — Л. Т. Расоха), якая заваявала дыплом другой ступені.

Традыцыйна добра пастаўскія школьнікі выступаюць на алімпія­дзе па гісторыі і геаграфіі. Сёлета яны таксама вярнуліся з вобласці з узнагародамі па гэтых прадметах. Дыплом трэцяй ступені па гісторыі прывёз вучань 11 класа Лынтупскай яслі-сад-сярэдняй школы Максім Данілаў (настаўнік — С. С. Васільеў). Такой жа вартасці дыпломы па геаграфіі ў сёлетніх выпускніц Кацярыны Дунец з гімназіі (настаўнік — І. М. Пракаповіч) і Таццяны Харко з Варапаеўскай СШ (настаўнік — А. А. Гарны). Яшчэ адзін выхаванец гімназіі, 11-класнік Андрэй Кавалёнак, удастоены дыплома трэцяй ступені па працоўным навучанні (яго выкладае Ф. У. Дзевятоўскі). А на рахунку Таццяны Машніч, якая заканчвае СШ №1, такі ж дыплом па грамадазнаўстве (настаўніца — А. У. Кашырына).

У агульным заліку па колькасці заваяваных дыпломаў мы займаем другое месца сярод сельскіх раёнаў. Найбольш іх — 13 — толькі ў каманды Глыбоцкага раёна. Але і ўдзельнікаў абласнога этапа алімпіяды з Глыбоччыны было намнога больш, чым ад нас (з нашага боку ўдзельнічалі 19 чалавек). На трэцім месцы з 8 дыпломамі каманда Верхнядзвінскага раёна.

Алена ШАПАВАЛАВА.