Поставские спасатели вознаграждены за образцовое исполнение служебных обязанностей (+фото)

Сустрэча палкоўніка ўнутранай службы, начальніка абласнога ўпраўлення Міністэрства па надзвычайных сітуацыях Васілія Чэкана з асабовым складам раённага аддзела атрымалася кароткай, але  запамінальнай. У Паставы ён прыехаў з ганаровай місіяй: уручыць лепшым выратавальнікам аддзела грашовае ўзнагароджанне за ўзорнае выкананне службовых абавязкаў, дасягненне высокіх вынікаў у службе, умелыя дзеянні па ліквідацыі надзвычайных сітуацый, праяўленыя пры гэтым мужнасць і гераізм. Такое матэрыяльнае заахвочванне ў сістэме Міністэрства па надзвычайных сітуацыях Рэспублікі Беларусь прымяняецца з 2011 года. І, як паказаў час, з’яўляецца добрым стымулам.

— Для вашага аддзела, як і ў цэлым для абласнога ўпраўлення, 2012 год характэрны тым, што зменшылася колькасць пажараў і загінулых на іх,  больш выратавана людзей, якія трапілі ў бяду, — адзначыў Васілій Чэкан. — Гэтаму садзейнічалі некалькі фактараў, у тым ліку рост прафе­сійнага майстэрства, што і прадэманстравалі выратавальнікі пажарнай аварыйна-выратавальнай часці №1 раённага аддзела па надзвычайных сітуацыях.

Высокую ацэнку міністра заслужылі рашучыя, граматныя дзеянні старшага інструктара-выратавальніка Валерыя Сеганкевіча, майстра-выратавальніка Уладзіміра Казака, хіміка-дазіметрыста Яўгенія Крэміса і вадзі­целя Аляксандра Захарыча,  якія ў снежні на возеры Халасцінскае  выратавалі  трох грамадзян.

Дзякуючы  прафесіяналізму капітана ўнутраных спраў, начальніка змены Ігара Сіраша, старшага інструктара-выратавальніка Гена­дзія Пяткоўскага, майстра-выратавальніка Ігара Багрудэнкі і вадзі­целя Андрэя Сідлярэвіча ў студзені па вуліцы Я. Купалы ў райцэнтры з палаючай кватэры быў выратаваны яе гаспадар.

У абстаноўцы моцнага задымлення ў адным з дамоў па вуліцы Ленін­скай у Паставах, дзе ўзнік пажар, дзейнічалі капітан унутранай службы, інжынер аддзялення хімічнай і радыяцыйнай абароны Уладзімір Лелякоў і майстар-выратавальнік Юрый Шаўчук. Яны выратавалі і перадалі брыгадзе хуткай дапамогі грамадзяніна К.

Уручыўшы грашовыя ўзнагароджанні  (ад 17 да 40 базавых велічынь кожнаму), начальнік абласнога ўпраўлення МЧС Васілій Чэкан пажадаў выратавальнікам райаддзела  і ў далейшым адважна праяўляць сябе ў надзвычайных сітуацыях і ў іншых складаных абставінах, пастаянна ўдасканальваць  прафесійнае майстэрства і фізічную загартоўку.

—  У мінулым годзе часцей за ўсё даводзілася тушыць пажары ў дамах і кватэрах, загаранні аўтамашын, ратаваць людзей з агню і на вадзе, — сказаў капітан унутраных спраў, начальнік раённага аддзела МЧС Аляксей Кісель. — Асабовы склад спраўляецца з пастаўленымі задачамі. Ды інакш і не можа быць, бо прафесію выратавальніка выбралі муж­­ныя, дужыя людзі. Свае службовыя абавязкі яны выконваюць  годна.

Тэкст і фота Пятра КУРЫЛОВІЧА.