Кто она, поставская “Леди Совершенство”?

Навіна, што ў Паставах пройдзе конкурс прыгажосці, здзівіла: такія мерапрыемствы ў нас яшчэ не праводзіліся. Дзяўчат, вартых звання самай абаяльнай і прыцягальнай, заўсёды было шмат, але арганізаваць свята прыгажосьці чамусьці не было каму.

Сёлета смельчакі знайшліся. За няпростую і новую для сябе справу ўзяліся творчыя, ініцыятыўныя пастаўчанкі —  уладальніца салона “Вясельны рай” Ганна Вілісава і візажыст, уладальніца сервіснага цэнтра “Арыфлэйм” у Паставах Вераніка Марозава.

Арганізацыю конкурсу прыгажосці “Ледзі Дасканаласць” дзяўчаты пачалі яшчэ ў жніўні. Разрэкламаваўшы мерапрыемства сярод знаёмых і ў інтэрнэце, пачалі адбор удзельніц. Зацікавілася дванаццаць пастаўчанак. Кожнай з ёй быў зроблены прафесійны макіяж і арганізавана фотасесія.

Восем самых-самых выбіралі ў інтэрнэце. На афіцыйнай старонцы конкурсу арганізавалі галасаванне. Па яго выніках у фінал прайшлі Вольга Касюра, Юлія Ражко, Ірына Гутар, Інэса Нігруца, Наталля Драгунова, Кацярына Кабяк, Таццяна Шубелька і Кацярына Жолнер. За тытул “Міс Дасканаласць” яны паспрачаліся 11 лістапада ў раённым Доме культуры.

Удзельніц чакалі чатыры этапы спаборніцтваў. Першы — “візітная картка”. Прытрымліваючыся прынцыпу “Кароткасць — сястра таленту”, прыгажуні за дзве-тры хвіліны расказалі пра сябе і свае захапленні. Вершы, песні, слайды з фотадымкамі — у кожнага быў свой падыход да задання.

Таму і ацэньваць канкурсантак было няпроста. А рабілі гэта начальнік аддзела культуры райвыканкама Аксана Сакалова, дырэктар кампаніі “Арыфлэйм”, прафесійны візажыст Аксана Маскаленка, начальнік разліковага касавага цэнтра № 1 Белаграпрамбанка Дзмітрый Собаль і галоўны спецыяліст аддзела ідэалагічнай работы райвыканкама Вячаслаў Шурпік, незалежны эксперт Аляксандр Бакуновіч.

Другі іспыт — “Размінка”. Пастаўчанкі адказалі на пытанні журы, дэманструючы сваё аратарскае майстэрства і ўменне арыгінальна мысліць.

Самым відовішчным стаў трэці этап спаборніцтваў. Кожная канкурсантка прэзентавала свой “каронны нумар”. Вось дзе раскрыліся таленты дзяўчат! Тут было ўсё: кранальныя вершы і песні, танец жывата, ігра на домры, пантаміма, і нават… фаршыраваны шчупак. Выдатныя кулінары таксама былі сярод удзельніц!

Закончыліся творчыя спаборніцтвы дэфіле (як жа без яго на конкорсе прыгажосці?). Канкурсанткі прадэманстравалі гледачам свае эксклюзіўныя ўборы. Члены журы ацанілі грацыёзнасць і лёгкасць паходкі, уменне трымацца на сцэне і выставілі свае апошнія адзнакі.

Найбольшую суму балаў за ўсе чатыры творчыя іспыты набрала выкладчыца музыкі, педагог-арганізатар Наталля Драгунова. Яна і атрымала тытул “Ледзі Дасканаласць”, а да яго — пяцідзесяціпрацэнтную скідку на пракат вясельнай сукенкі ў салоне “Вясельны рай”, набор касметыкі і бясплатную прафесійную фотасесію. Другое месца ў конкурсе заняла эканаміст Пастаўскай ЦРБ Юлія Ражко, якая атрымала паўгадавы сертыфікат на бясплатны макіяж у сервісным цэнтры “Арыфлэйм” і набор касметыкі. Дыпломамі былі ўзнагарожаны ўсе ўдзельніцы конкурса.

“Я ніколі не была ідэальнай, але заўсёды шчаслівай, — сказала пераможца Наталля Драгунова яшчэ падчас сваёй прэзентацыі. — Я жыву ў творчым свеце музыкі, займаюся любімай справай, дзялюся сваім талентам з дзецьмі”. Яно так заўсёды: шчаслівыя людзі — самыя прыгожыя.

Іна СНЯЖКОВА.

Фота Альфрэда Мікуса.