В районном краеведческом музее открылась новая фотовыставка

Шляхамі залатой восені прайшоў сёлета пастаўчанін Васілій Белякоў і захаваў яе прыгажосць у фотаздымках. Да канца лістапада  імі можна палюбавацца ў раённым краязнаўчым музеі.

У экспазіцыі семдзясят дзве работы. Іх галоўная гераіня — рознакаляровая восень. Здымкі зроблены на Пастаўшчыне і ў бліжэйшых рэгіёнах: Браслаўшчыне, Мядзельшчыне, Глыбоччыне…

Па жывапісных мясцінах Васілій Белякоў вандраваў больш за месяц. Пераадолеў пятнаццаць пешых і пяць веласіпедных маршрутаў — а гэта каля пяцісот кіламетраў! Такія “марш-кідкі”, як і фотавыставы, неўтаймоўны пастаўчанін арганізуе часта — ну вельмі любіць прыроду, актыўны лад жыцця і фатаграфію.

—      Па натуры я вялікі падарожнік, за жыццё аб’ездзіў паўсвету — расказваў Васілій. —  Камчатка, Курылы, Урал, Крым, Каўказ — дзе толькі ні пабываў! За жыццё месца жыхарства змяніў дзевяць разоў, але лепшай краіны, чым Беларусь, не сустракаў.

У Паставы Васілій Бялоў прыехаў пасля распаду Савецкага Саюза. Паставіўшы кропку ў ваеннай кар’еры, адным з першых у нашым горадзе  пачаў займацца прадпрымальніцкай дзейнасцю. І сёння многія пастаўчане памятаюць арганізаваныя ім выступленні Мінскага тэатра аперэты.

Не толькі творчасць, але і спорт заўсёды захаплялі Васілія Белякова. У шматлікіх спаборніцтвах ён удзельні­чае з дзяцінства і да сённяшняга дня. Такому актыўнаму ладу жыцця спрыяла і вучоба на геалагічным факультэце Іркуцкага ўніверсітэта. Колькі соцень кіламетраў тайгі, пустыняў і стэпаў давялося прайсці, вывучаючы таямніцы зямлі! Адным было цяжка, яму — надзвычай цікава.

Пра незвычайную любоў да прыроды сведчыць і наступны факт: па словах Васілія, ён за жыццё пасадзіў больш за адзінацаць тысяч дрэў і кустоў. І гэта яшчэ не мяжа.

Прырода ў даўгу не застаецца: заражае чалавека выдатным настроем і аптымізмам, натхняе ў жыццёвых і творчых справах.

—      Я люблю любую пару года, — прызнаецца Васілій Белякоў. — Не баюся ні спёкі, ні дажджу, ні завеі. Як і любы творчы чалавек, у захапленні ад восені — такой  рамантычнай і паэтычнай. Яна так умее пазіраваць! У маіх работах няма ні кроплі фоташопу — толькі натуральная прыгажосць.

Палюбавацца ёй змогуць не толькі пастаўчане. Выстава Васілія Белякова “Шляхамі залатой восені” з нашага горада “пераедзе” ў Мядзел.

Іна СНЯЖКОВА.

Фота з архіва Васіля Белякова.