Поставчанка Елена Головко — «Вице-Мисс филиала Белгосстраха по Витебской области-2012″

“Міс філіяла “Белдзяржстраху” па Віцебскай вобласці-2012” — Сальвіна Карапецян з Віцебска і віцэ-міс пастаўчанка Алена Галаўко

У кастрычніку гэтага года  ўпершыню прайшоў рэспубліканскі конкурс “Міс Белдзяржстрах-2012”. На яго абласным этапе разам з яшчэ 14 прадстаўніцамі з Віцебска, Наваполацка, Полацка, Оршы,  Аршанскага, Верхня­дзвінскага, Глыбоцкага, Міёрскага, Талачынскага, Чашніцкага і Расонскага раёнаў удзельнічала пастаўчанка Алена Галаўко. За чатыры гады,  што працуе спецыялістам прадстаўніцтва філіяла Белдзяржстраху па Пастаўскім раёне, дзяўчына зарэкамендавала сябе не толькі на асноўнай рабоце. Яна добры арганізатар і выканаўца, актыўна ўдзельнічае ў грамадскім жыцці калектыву. Асабіста мне Алена запомнілася на сустрэчы маладых спецыялістаў Пастаўшчыны, на свяце, прысвечаным 90-годдзю Белдзяржстраху і іншых мерапрыемствах.

Але конкурс —  гэта больш высокі ўзровень. На яго, як правіла,  збіраюцца  найбольш падрыхтаваныя, лепшыя з лепшых. Алена Галаўко адчувала, што можа  паспаборнічаць з іншымі ў эрудыцыі, знаходлівасці, творчасці. Урэшце, галоўнае — не перамога, а ўдзел, тым больш што такое мерапрыемства праводзілася ўпершыню.

На падрыхтоўку да яго канкурсанткі мелі ўсяго два тыдні. За гэты абмежаваны час дзяўчына разам з сяброўкамі паспела многае зрабіць і ехала ў абласны цэнтр з надзеяй выступіць не горш за іншых. Як і ўсе, хвалявалася, але не гублялася. Узяўшы ў спадарожнікі добры настрой і гумар, Алена роўна, дастаткова прафесійна і артыстычна выступіла ва ўсіх чатырох турах. Яе “Візітная картачка” — расказ пра сябе, прафесію і калектыў — была паказана ў выглядзе рэкламнага роліка. Інтэлектуальны конкурс таксама вытрымала годна. Прыгожым і вясёлым атрымалася творчае спаборніцтва, падчас якога Алена пастаралася паказаць усё, на што здольная. А потым было дэфіле ў вячэрніх сукенках і чаканне вердыкту журы.

Хваляванне ўсё больш нарастала па меры таго, як канкурсанткам прысвойвалі званні: “Міс Прафесія”, “Міс Эрудыцыя”, “Міс Артыстызм”, “Міс Зачараванне”, “Міс Грацыя”, “Міс Стыль”, “Міс Арыгінальнасць”. І вось самы кульмінацыйны момант — віцэ-міс была названа наша Алена Галаўко, а пераможцай абласнога этапа конкурсу і ўладальніцай звання “Міс філіяла “Белдзяржстраху” па Віцебскай вобласці-2012” — Сальвіна Карапецян з Віцебска.

Намінанты і пераможцы атрымалі дыпломы, памятныя сувеніры, кветкі.

— Пасля завяршэння конкурсу прайшоў пэўны час, а ўражанні  перапаўняюць і цяпер, — расказвала Алена. — Удзел у ім дазволіў пашырыць кругагляд,  пераадолець пэўныя сумненні.  А яшчэ мы моцна пасябравалі паміж сабой і цяпер падтрымліваем сувязь. Усе дзяўчаты рады за Сальвіну. Яна сапраўды была мацнейшай, што і даказала нядаўна на рэспубліканскім фінале ў Мінску, стаўшы пераможцай.

Тэкст і фота Пятра КУРЫЛОВІЧА.