Поставчане шокировали столицу

“Дынама” (Мінск) – “ПМЦ-Паставы” – 1:2

У двух чарговых матчах нацыянальнага першынства пастаўчане гулялі супраць вельмі моцных сапернікаў — базавых клубаў юнацкай зборнай Беларусі. Спачатку на сваім полі яны атрымалі валявую перамогу з лікам 2:1 над выхаванцамі рэспубліканскага цэнтра алімпійскай падрыхтоўкі БДУ, хоць у гэтым матчы ў самым пачатку сталі прайграваць мінчанам. Каля варот “ПМЦ” якраз падчас дажджу з градам узніклі яшчэ тры вострыя моманты. Але на апошнім рубяжы надзейна згуляў варатар Андрэй Вілейта.

Калі над стадыёнам зноў выглянула восеньскае сонца, нападаючы пастаўчан Глеб Жалезнікоў лік зраўняў, а ў напружанай канцоўцы яго калега па амплуа Павел Ясінскі вывеў сваю каманду наперад. Трэнерскі штаб гасцей замест аб’ектыўнага разбору матча стаў абвінавачваць у паражэнні судзейскую брыгаду і паскардзіўся ў федэрацыю футбола на тое, што нібыта за “ПМЦ” гулялі падстаўныя футбалісты. Таму праз тры дні на чарговым матчы ў беларускай сталіцы з дынамаўцамі нашу каманду пільна праверылі і, зразумела, ніякіх парушэнняў рэгламенту не знайшлі.

У сустрэчы з выхаванцамі флагмана беларускага футбола пастаўчане толькі ў пачатку паядынку крыху хваляваліся. А потым мінскія трэнеры на чале з сынам праслаўленага ў мінулым бамбардзіра Міхаіла Мустыгіна не маглі зразумець, як гэта каманда з “вёскі” стала гуляць лепш за занадта ганарлівых мінчукоў і дыктаваць сваю волю. Увесь свой гнеў сталічныя гора-спецыялісты чамусьці зноў абрушылі на суддзяў і не саромеліся выказвацца. А вось юныя пастаўчане, хоць і прапусцілі крыўдны гол у свае вароты на 20-ай хвіліне пасля падачы вуглавога, не разгубіліся. І загулялі так, як умеюць. Павел Ясінскі пасля хуткага фланговага праходу і перадачы Ільі Кухарчыка зраўняў лік. У пачатку другога тайма падобны манеўр удаўся Глебу Жалезнікову, і ад абаронцы дынамаўцаў мяч трапіў у свае вароты. Шанцаў выратаваць сітуацыю госці мінчанам не далі і замацавалі сваё лідзіруючае становішча. Камандзе “ПМЦ” прынеслі такія важныя перамогі Чашун, Камісарчук (Танана), Ванда (к), Сакалоў, Лузан (Дубін), Бяльчонак, Александровіч, Вілейта (Павініч), Кухарчык (Хаткевіч), Жалезнікоў, Ясінскі.

За гульнёй пастаўчан уважліва сочаць спецыялісты, бо шэраг нашых лепшых футбалістаў могуць быць загуляны і ў беларускай зборнай. Выдатнай адзнакі заслужылі за сваю гульню і юнакі “ПМЦ-2”, якія завяршылі свой матч з мінчанамі ўнічыю з лікам 1:1 (пастаўчан вывеў наперад Багдан Садоўскі). 25 кастрычніка ў нашым райцэнтры адбудзецца цікавая сустрэча з рэзервістамі яшчэ аднаго моцнага клуба — БАТЭ (Барысаў).

Уладзімір ШЫК.