“Мы, беларусы, — мірныя людзі”

У рамках рэспубліканскай грамадска-культурнай акцыі “Мы, беларусы, — мірныя людзі” ў гэту нядзелю, 15 сакавіка, у раённым Доме культуры ў Паставах выступіць сімфанічны аркестр Віцебскай абласной філармоніі. Пачатак канцэрта ў 14.00. Кошт білета — 25 тысяч рублёў.

Названую акцыю ў перыяд з лютага па лістапад 2015 года праводзіць Міністэрства культуры Рэспублікі Беларусь сумесна з ЗАТ “Другі нацыянальны тэлеканал”, аблвыканкамамі і Мінгарвыканкамам. Асноўнай яе задачай з’яўляецца ўмацаванне адзінства беларускага народа ў год правядзення важнейшых палітычных падзей у жыцці беларускай дзяржавы і фарміраванне патрыятычнай самасвядомасці грамадзян.

Старт акцыі быў дадзены 23 лютага ў Магілёве канцэртам салістаў Нацыянальнага акадэмічнага Вялікага тэатра оперы і балета Рэспублікі Беларусь. Як плануецца, яна пройдзе ў два этапы: з лютага па жнівень і з верасня па лістапад. У ходзе першага этапа ў абласных і раённых цэнтрах краіны, аграгарадках і г. Мінску адбудуцца канцэрты з удзелам вядучых прафесійных і аматарскіх калектываў і выканаўцаў рэспублікі, а таксама папулярных артыстаў беларускай эстрады. Кульмінацыяй першага этапа стане гала-канцэрт “Мы, беларусы, — мірныя людзі”. Ён адбудзецца 3 ліпеня 2015 года каля абеліска “Мінск — горад-герой” у рамках святкавання Дня Незалежнасці Рэспублікі Беларусь.

На другім этапе акцыі ЗАТ “Другі нацыянальны тэлеканал” разам з Міністэрствам культуры, аблвыканкамамі і Мінгарвыканкамам правядуць абласныя гала-канцэрты на буйных сцэнічных пляцоўках, а таксама фінальныя мерапрыемствы ў Мінску з наступнай трансляцыяй іх тэлеверсій. У канцэртных праграмах прымуць удзел папулярныя артысты беларускай эстрады і маладыя выканаўцы, пераможцы тэлепраектаў і конкурсаў.

Алена ШАПАВАЛАВА.