Праяўляе ініцыятыву і дабіваецца выдатных вынікаў

Старшы оперупаўнаважаны групы па наркакантролі і супрацьдзеянні гандлю людзьмі крымінальнай міліцыі РАУС Павел Свірбутовіч — адзін з 14 намінантаў, каму сёлета прысвоена званне “Чалавек года Пастаўшчыны”.

Па словах начальніка райаддзела Аляксандра Мікалаевіча Гаруса, Павел — сапраўдны афі­цэр, на якога павінны раўняцца ўсе супрацоўнікі органаў унутраных спраў, найлепшы ўзор пераймання для моладзі. Ён беспярэчна выконвае любыя загады кіраўніцтва, праяўляе ініцыятыву ў рабоце і дабіваецца выдатных выні­каў. Актыўна ўдзельнічае ў спартыўных мерапрыемствах, заўсёды падцягнуты, мае бездакорны знешні выгляд. Шчыры і адкрыты ў зносінах з людзьмі і калегамі ў прыватнасці, карыстаецца аўтарытэтам не толькі ў сваёй службе, але і ва ўсім РАУС.

Прызнацца, пачуўшы такую характарыстыку, падумала, што яна крыху перабольшана. Але з кожнай хвілінай размовы з Паўлам пераконвалася: усё сказанае вышэй — абсалютная праўда.

У Пастаўскім РАУС П. М. Свірбутовіч служыць 7 гадоў. Прыйшоў сюды, маючы за плячыма вучобу ў Ашмянскім аграрна-экана­мічным каледжы, дзе атрымаў сярэднеспецыяльную юрыдычную адукацыю, і паўтара года тэрміновай ваеннай службы ва ўнутраных войсках МУС. Падчас яе нярэдка даводзілася заступаць на ахову грамадскага парадку, канваіраваць асуджаных у папраўчыя калоніі, суправаджаць іх у судзе. Так непасрэдна пазнаёміўся з міліцэйскімі буднямі і, калі настаў час дэмабілізацыі, вырашыў застацца ў органах унутраных спраў. Закончыў 6-месячныя курсы павышэння кваліфікацыі ў Мінску, атрымаў званне малодшага лейтэнанта, а затым паступіў на завочнае аддзяленне ў Полацкі дзяржуніверсітэт, які нядаўна паспяхова закончыў.

Сапраўдную праверку на прафесійную прыгоднасць маладому афіцэру выпала праходзіць на роднай Лынтупшчыне, куды яго назначылі ўчастковым інспектарам міліцыі. Каля 5 гадоў абслугоўваў тэрыторыю самага аддаленага ад горада сельсавета, ды якога!

— Да мяне на гэтым участку часта мяняліся інспектары, падоўгу ніхто не затрымліваўся, — расказваў. — Таму крымінагенная абстаноўка была напружанай, працвіталі п’янства, самагонаварэнне. Спачатку прыйшлося няпроста, але паступова дабіўся нядрэнных вы­нікаў. Ужо праз год службы заняў другое месца ў конкурсе сярод маладых участковых інспектараў Віцебшчыны.

У 2013-ым кіраўніцтва райаддзела прыняло рашэнне перавесці Паўла ў крымінальную міліцыю, назначыўшы яго на пасаду старшага оперупаўнаважанага групы па наркакантролі і супрацьдзеянні гандлю людзьмі. І тут ён у хуткім часе праявіў сябе — практычна ў два разы палепшыў паказчыкі аператыўна-службовай дзейнасці. І гэта пры тым, што ў названым падраздзяленні працуе адзін. Справіцца з вялікім аб’ёмам работы было б немагчыма без дапамогі калег, якія дзеляцца аператыўнай інфармацыяй, аказваюць са­дзейнічанне ў правядзенні рэйдавых мерапрыемстваў.

Увогуле, служба, прызнаецца Павел, займае вельмі шмат часу, нярэдка даводзіцца працаваць па вечарах і нават ноччу, у выхадныя дні. Тым не менш, нягледзячы на загружанасць, ён знаходзіць свабодную мінутку для заняткаў спортам, абараняе гонар РАУС на ўсіх абласных спаборніцтвах і займае прызавыя месцы ў асабістым і камандным заліках па розных відах: рукапашным боі, самба, лёгкай атлетыцы. Пра гэта сведчаць шматлікія граматы, дыпломы і медалі на сцяне рабочага кабінета. Тое ж, што яго ўдастоілі звання “Чалавек года Пастаўшчыны”, стала для Паўла прыемнай нечаканасцю.

— Цяпер я адчуваю павышаную адказнасць перад калегамі і жыхарамі раёна, — сказаў ён. — Трэба яшчэ актыўней змагацца з наркаманіяй, каб апраўдаць давер людзей.

Алена ШАПАВАЛАВА.

Фота аўтара.