Ззяе горад ілюмінацыяй

Пераможцы і прызёры конкурсу разам з намеснікам старшыні райвыканкама П. Р. Станюшам і начальнікам аддзела жыллёва-камунальнай гаспадаркі М. К. Доўмантам ля навагодняй ёлачкі ў райвыканкаме.

У апошні дзень 2014 года адбылася традыцыйная сустрэча кіраўніка раённай вертыкалі В. С. Гутарава з работнікамі аддзелаў і ўпраўленняў выканаўчага камітэта. Віктар Сяргеевіч расказаў аб асноўных выніках, атрыманых у прамысловасці, сельскай гаспадарцы, іншых галінах гаспадарчага і сацыяльнага комплексаў Пастаўшчыны, падзякаваў дзяржаўным служачым за іх уклад у агульныя набыткі, спыніўся на задачах на 2015 год. Пажадаў поспехаў у ажыццяўленні намечаных планаў, асабістага  шчасця, моцнага здароўя, добрага настрою. А затым уручыў Падзячныя пісьмы і каштоўныя падарункі кіраўнікам калектываў, якія сталі пераможцамі і прызёрамі агляду-конкурсу па навагоднім афармленні горада.

Адметнай яго асаблівасцю з’явілася тое, што ў райцэнтры намнога больш стала ілюмінацый, вулічных электрычных гірляндаў самых розных  колераў, відаў і рэжымаў. У святлотэхнічным афармленні  аб’ектаў, большасць з якіх размешчаны на цэнтральных вуліцах і ў мікрараёнах горада,  праяўлена шмат творчасці, новых падыходаў, выкарыстаны сучасныя матэрыялы.

Асабліва пастараліся філіял “ ДЭУ-33”, ААТ “Паставымэбля”, АБП “Рассвет Пастаўскі”, завод “Беліт”, малочны завод, адміністрацыя іншых прамысловых прадпрыемстваў і арганізацый горада. Пераможцамі агляду-конкурсу сярод прамысловых прадпрыемстваў прызнаны філіял “Пастаўскае ДРБУ-132”, прадпрыемства меліярацыйных сістэм і лясгас.

Сярод аб’ектаў сацыяльнай сферы найбольш прыгожай і прывабнай  выглядае тэрыторыя прафтэхкаледжа. Гэтай навучальнай установе і прысу­джана першае месца. У ліку прызёраў — СШ №3 і тэрытарыяльны цэнтр сацыяльнага абслугоўвання насельніцтва.

Найбольшы аб’ём работы па ўпрыгажэнні правяло УП “Жыллёва-камунальная гаспадарка Пастаўскага раёна”.  Дзякуючы падсветцы, ілюмінацыі горад, асабліва ў цэнтры, выглядае казачным. Унітарнае прадпрыемства і стала пераможцам  конкурсу ў намінацыі “Сфера абслугоўвання”, а другое і трэцяе месцы занялі адпаведна філіял “Аўтатранспартнае прадпрыемства №17”  і філіял №216 цэнтра банкаўскіх паслуг г. Паставы.

Сярод прыватных прадпрымальнікаў і домаўладальнікаў адзначаны магазін “Ладушкі”, дзіцячы сад №4, Ігар Вячаслававіч Гінько (дом №27 па вул. Ленінскай), Аляксандр Мікалаевіч Коваль (дом №163 па вул. Ленінскай), Рамуальда Фляр’янаўна Мажэйка (дом №99 “А” па вул. 17 Верасня).

Творча аднесліся да ўпрыгажэння сваіх адміністрацыйных будынкаў і іншых аб’ектаў цэнтральная райбальніца, раённы Дом культуры, СШ №1 і №5, рэдакцыя райгазеты, райспажыўтаварыства, райгаз, аддзяленне “Бел­аграпрамбанка”, участак Энергазбыту, раённы вузел электрасувязі, цырульня “Шалунья”, магазіны “Мегастрой”, “Элегия”, “Арбузик”, “Смак” і некаторыя іншыя.

“Вясёлка” ілюмінацыі ў горадзе будзе радаваць жыхароў і гасцей да 14 студзеня.

Пётр КУРЫЛОВІЧ.