Дзякуючы кіраўніку і ўсяму калектыву

Старшы майстар Андрэй Гайковіч (другі справа) і дарожныя рабочыя Дзмітрый Лоўкіс, Аляксандр Харашэвіч, Аляксандр Кейзік, Валянцін Рачыцкі, Іван Лоўкіс.

Другі месяц пад кіраўніцтвам старшага майстра Андрэя Гайковіча ў мікрараёне будаўнікоў у Паставах вядзецца капітальны рамонт вуліцы Ленінскай. Рабочыя Дзмітрый Лоўкіс, Аляксандр Харашэвіч,  Аляксандр Кейзік, Валянцін Рачыцкі, Іван Лоўкіс і іншыя дарожнікі філіяла “Пастаўскае ДРБУ-132”  ужо ўклалі 650 бардзюраў, устанавілі на аўтобусных прыпынках два павільёны, заасфальтавалі тратуары і пасадачныя пляцоўкі,  выканалі шэраг іншых работ. Вуліца стала больш шырокай і неўзабаве “апране” новае асфальтавае пакрыццё. Бу­дзе наведзены парадак на газонах і іншых прылеглых тэрыторыях. У гэтай справе ў пастаўскіх дарожнікаў ёсць не толькі пэўны вопыт, але і адпаведнае прызнанне. Па выніках 2013 года ДРБУ-132 было прысуджана трэцяе месца ў абласным конкурсе на лепшае афармленне адміністрацыйных памяшканняў і прылеглых тэрыторый, узорнае навядзенне парадку на зямлі сярод арганізацый КУП “Віцебск­аблдарбуд”.

І ўвогуле, як адзначалася на сходзе з нагоды прафесійнага свята, калектыў па асноўных паказчыках пастаянна ў ліку лепшых на Віцебшчыне. Вось і  сёлета за дзевяць месяцаў выканана работ на 29 мільярдаў рублёў. Рост да адпаведнага перыяду мінулага года склаў 23%. Не адбылося ніводнага дарожна-транспартнага здарэння па віне дарожнай службы. Гэта стала магчымым дзякуючы таму, што ў летне-асенні перыяд ДРБУ-132 мела нядрэнны пакет заказаў, у ліку якіх былі аб’екты як у нашым, так і ў Гарадоцкім, Ушацкім і Мядзельскім раёнах.

— Узятыя тэмпы мы можам захаваць і ў далейшым, — адзначыў, павіншаваўшы са святам членаў працоўнага калектыву, начальнік філіяла С. А. Рагіня. — У нас маецца шэраг незавершаных аб’ектаў, якія стабільна фінансуюцца з бюджэту і іншых крыніц. Добрыя перспектывы звязаны з адкрыццём кар’ера ў раёне вёскі Пятровічы Дунілавіцкага сельсавета. Працягваецца будаўніцтва лясной дарогі ў Варапаеўскім лясніцтве. Трэба прыняць усе магчымыя меры, каб да халадоў завяршыць добраўпарадкаванне вуліцы Ленінскай і тэрыторыі льнозавода, надзейна падрыхтаваць тэхніку, якая будзе за­дзейнічана на зімовых дарогах. Галоўным для нас з’яўляецца неабходнасць паляпшэння фінансавання работ, якія непасрэдна звязаны з утрыманнем і рамонтам дарог. А іх у падпарадкаванні філіяла з колькасцю працуючых нямногім больш за сто чалавек амаль тысяча кіламетраў.

Пра тое, што калектыў, нягледзячы на цяжкасці, здольны справіцца з пастаўленымі задачамі, на сходзе гаварылі генеральны дырэктар КУП “Віцебскаблдарбуд” У. С. Мацвееў, намеснік старшыні райвыканкама П. Р. Станюш. Яны асабліва адзначалі кіраўніка ДРБУ-132 Станіслава Альфрэдавіча Рагіню, які здолеў не толькі захаваць калектыў, але і забяспечыць прыкметны рух наперад, надаць надзеі і веры людзям. Многія з іх атрымалі заслужаныя ўзнагароды напярэдадні свята.

Вышэйшай адзнакі Міністэрства транспарту і камунікацый Рэспублікі Беларусь —  знака “Ганаровы дарожнік Беларусі” другой ступені — удастоены ветэран працы, дарожны майстар Мечыслаў Янковіч.

У. С. Мацвееў віншуе з узнагародай Мечыслава Янковіча.

Граматамі “Віцебскаблдарбуда” і Падзякамі ўнітарнага прадпрыемства ўзнагароджаны машыністы Аляксандр Асяненка і Рычард Радзюш, вадзіцелі  Міхаіл Шульскі і Юрый Гутар. Ганаровыя званні “Ветэран працы” з уручэннем пасведчанняў прысвоены машыністу Леаніду Куцуху і вадзіцелю Сяргею Асяненку. Узнагароды раённага выканаўчага камітэта атрымалі Сяргей Сабіранаў і Часлаў Бякаўліс. Лепшых работнікаў заахвоцілі таксама адміністрацыя і прафсаюзны каміэт ДРБУ. Музычныя падарункі паднеслі дарожнікам удзельнікі заслужанага аматарскага калектыву Рэспублікі Беларусь фальклорнага ансамбля “Паазер’е”.