Газета «Пастаўскі край» перамагла ў рэспубліканскім конкурсе

У мінулую суботу па выкліку Міністэрства інфармацыі я ехала ў камандзіроўку ў старажытнае Заслаўе. Радавала, што выдалася нагода пабачыць гарадок, дзе сёлета праходзіла свята беларускага пісьменства, яшчэ больш — мэта камандзіроўкі — удзел у цырымоніі ўзнагароджвання пераможцаў рэспубліканскага творчага конкурсу “Моцная сям’я — моцная дзяржава”, які ўжо ў трэці раз правялі Міністэрства інфармацыі Рэспублікі Беларусь і грамадскае аб’яднанне “Беларускі саюз жанчын”. Рэдакцыя нашай газеты прыняла ўдзел у гэтым конкурсе,  і “Пастаўскі край” выйшаў у лік пераможцаў у намінацыі “Лепшыя матэрыялы ў друкаваных рэгіянальных СМІ”. З раённых газет краіны адзначана ўсяго шэсць.

Адметна, што цырымонія ўзнагароджвання праходзіла ў рамках святкавання Дня маці, на якое ў Заслаўе былі запрошаны дзясяткі мнагадзетных маці з розных куточкаў краіны. Іх цёпла вітала намеснік старшыні Беларускага саюза жанчын Антаніна Морава, для іх гучалі са сцэны пранікнёныя песні, а дадому ўсе маці вярнуліся з добрымі падарункамі і прыгожымі кветкамі.

Ну а звяртаючыся да журналістаў, міністр інфармацыі Беларусі Лілія Станіславаўна Ананіч падкрэсліла, што тэма сям’і павінна стаць адной з галоўных на старонках друкаваных рэспубліканскіх і рэгіянальных выданняў, у тэле- і радыёпраграмах, бо моцная сям’я — гэта той фундамент, з якога пачынаецца закладка базавых каштоўнасцей у кожным чалавеку.

Што да нашай газеты, то гэта тэма на яе старонках сапраўды адна з галоўных. Акрамя тэматычнай старонкі “Сям’я”, прысутнічаюць такія рубрыкі, як “Ад сэрца”, “З любоўю”, “Промні дабрыні”, “Сямейны альбом”, “Прывітанне, свет! Я нарадзіўся!”, “Кветкі жыцця”, “На скрыжаваннях лёсаў”, “Мы — гаспадары”. Ды і іншыя, дзе мы знаёмім чытачоў з сем’­ямі, з якіх варта браць прыклад. Таму, безумоўна, прыемна, што старанне нашага рэдакцыйнага калектыву (а нам нямала дапамагаюць і пазаштатныя аўтары, за што ім вялікі дзякуй) заўважана на рэспубліканскім узроўні.

Дыплом пераможцы конкурсу і шыкоўны букет руж я атрымала з рук міністра інфармацыі Ліліі Станіславаўны Ананіч і старшыні Беларускага саюза жанчын Надзеі Андрэеўны Ермаковай. Гэта высокі гонар і яшчэ вышэйшая прафесійная адказнасць за тое, якім будзе “Пастаўскі край” у далейшым.

Фаіна КАСАТКІНА.