Стадыён абнавіўся

Сёлета гарадскі стадыён абнавіўся як ніколі раней: за некалькі месяцаў тут зманціраваны старыя і ўстаноўлены новыя трыбуны для гледачоў, з’явіліся міні-футбольнае поле і сучасная шматфункцыянальная пляцоўка. Такія маштабныя перамены адбыліся дзякуючы сродкам, якія выдзелілі ўпраўленне спорту і турызму Віцебскага аблвыканкама, раённы выканаўчы камітэт і Еўрасаюз.

У райцэнтры будынак ФАКа пабудаваны 26 гадоў таму. На той момант прылеглы да яго стадыён выглядаў вельмі сціпла: акрамя агароджы і футбольнага поля, тут больш нічога не было. У 1999 годзе была распачата першая чарга рэканструкцыі стадыёна. Паступова з’явіліся бегавая дарожка, трыбуны і тэнісная пляцоўка. Поле засеялі галандскай травой «Спортынг», прызначанай для футбольных пакрыццяў. Тут рэгулярна праводзяцца трэніроўкі, першынствы вобласці па футболе, спаборніцтвы сярод дзяцей і падлеткаў «Скураны мяч» і іншыя спартыўныя мерапрыемствы.

Але за 15 гадоў, што прайшлі з таго часу, трыбуны, зробленыя з дрэва, страцілі былую прывабнасць, а дзе-нідзе нават прыйшлі ў непрыгоднасць. Было вырашана замяніць усю падлогу на новую і ўстанавіць пластмасавыя ся­дзенні, якія да гэтага некаторы час спраўна служылі мінскаму стадыёну «Дынама», зараз закрытаму на рэканструкцыю. 700 ся­дзенняў абышліся ГА «Фізічная культура, спорт і турызм Пастаўскага раёна» ў суму каля сарака мільёнаў беларускіх руб­лёў. Усе работы па абнаўленні трыбун праведзены ўласнымі сіламі. Зрэшты, як і ўстаноўка варот на міні-футбольным полі і яго разметка. А вось шматфункцыянальная пляцоўка з’явілася дзякуючы дапамозе іншых арганізацый.

— Будаўнічы праект комплекснай пляцоўкі для гульні ў вялікі тэніс, міні-футбол і валейбол быў зацверджаны 2 гады таму. Да яго рэалізацыі прыступілі сёлета ў канцы жніўня. Фундамент пад пляцоўку зрабілі работнікі філіяла «Пастаўскае ДРБУ-132», астатнія работы — віцебская будаўнічая фірма «Цыркон». Пляцоўка была пабудавана за тыдзень, — расказаў генеральны дырэктар ГА «Фізічная культура, спорт і турызм Пастаўскага раёна» Мікалай Станіслававіч Рамейка. — На падмурак устаноўлена пластмасавае пакрыццё са стацыянарнай разметкай, у якім кожная дэталь мае пэўнае месца. У пакрыцці зроблены спецыяльныя адтуліны для ўстаноўкі стацыянарных варот, слупоў і вышкі — у залежнасці ад віду спорту. Зімой на гэтай пляцоўцы плануем заліць каток.

Комплексная пляцоўка для гульні ў вялікі тэніс, міні-футбол і валейбол з’явілася ў нашым горадзе ў рамках еўрапейскай праграмы міжнароднай тэхнічнай дапамогі «Здароўе — багацце», якая ажыццяўляецца ў прыгранічных раёнах Латвіі, Літвы і Беларусі. Грошы на пакрыццё, агароджу і неабходны інвентар выдзеліў Еўрасаюз, на будаўніцтва фундамента пляцоўкі — раённы выканаўчы камітэт. На заасфальтаваным участку побач з сучаснай шматфункцыянальнай пляцоўкай неўзабаве павінен з’явіцца трэнажорны комплекс.

Тэкст і фота Веранікі ФІЛАНОВІЧ.