Ствараюць утульнасць і камфорт

Загадчык склада А. В. Чавусаў, вадзіцелі У. І. Бяленка і А. З. Соўка.

Сваё прафесійнае свята 7 верасня адзначаюць і работнікі Пастаўскага філіяла АУП “Віцебскаблпаліва”. Пра тое, чым сёння жыве філіял, карэспандэнту “ПК” Алене Шапавалавай расказвае дырэктар Уладзімір Пятровіч КАЙРОВІЧ:

— Асноўнай задачай нашага філіяла з’яўляецца забеспячэнне насельніцтва, прадпрыемстваў і арганізацый горада і раёна палівам, а таксама аказанне паслуг па распілоўцы і колцы дроў, пагрузцы і дастаўцы паліва. У калектыве працуюць усяго 18 чалавек, але справу яны робяць вялікую — дапамагаюць ствараць утульнасць і камфорт на рабочых месцах і ў дамах жыхароў Пастаў­шчыны. Так, за сту­дзень—ліпень 2014 года філіял забяспечыў палівам 2365 дома­ўладанняў, рэалізаваў 2720 тон торфабрыкету і 7730 кубаметраў дроў. Праўда, сёння я хачу больш спыніцца не на вытворчых паказчыках, а на людзях, якія прафесійна і добрасумленна выконваюць свае абавязкі, чыя штодзённая праца стаіць за пафарбаванымі будынкамі, чыстай тэрыторыяй, дагле­джанымі тран­спартнымі сродкамі. Людзях, здольных вырашаць любыя пастаўленыя перад імі задачы, у любы час і ў любых пагодных умовах.

Сярод такіх загадчык склада А. В. Чавусаў, які аддаў галіне 18 гадоў. Больш за 10 гадоў адпрацавалі ў нашай арганізацыі спецыяліст па рабоце з кліентамі Ж. І. Дубоўская і прадавец склада г.п. Варапаева Л. Г. Цырук. Гэтым жанчынам прыходзіцца мець зносіны з людзьмі розных узростаў, у кожнага з якіх свой характар, тэмперамент, настрой, таму трэба не толькі праяўляць высокі прафесіяналізм і цярпенне, але і запасціся жыццёвай мудрасцю і пачуццём гумару.

З добрым настроем сустракаюць сваё прафесійнае свята вядучы эканаміст А. У. Ясінская і галоўны бухгалтар С. М. Антух, якая з’яўляецца яшчэ і актыўным кіраўніком нашай прафсаюзнай групы. У любое надвор’е — у спёку, дождж або снегапад, —  ад Лынтуп да Парыжа, ад Кураполля да Груздава штодзень развозяць насель­ніцтву дровы і торфабрыкет У. І. Бяленка, В. М. Козел, А. З. Соўка, А. А. Касцючкоў. Яны не толькі першакласныя вадзі­целі, але і адказныя, адданыя сваёй справе людзі. Нельга абысці ўвагай станочнікаў і распілоўшчыкаў С. М. Лісіцкага, А. А. Умпіровіча, Д. І. Вісоцкаса, Д. А. Нікіценку, у чые абавязкі ўваходзіць непасрэдна апрацоўка дроў. Хочацца таксама ўспом­ніць нашых ветэранаў, якія адпрацавалі ў арганізацыі не адзін дзясятак гадоў. Гэта З. У. Міронава, Р. С. Гарбінская, М. А. Жук, Я. І. Ермаловіч, Л. В. Тарасевіч і многія іншыя, каго мы заўсёды будзем цаніць і паважаць.

Шчыра віншую іх і цяперашніх работнікаў прадпрыемства з надыходзячым святам! Жадаю ім, іх родным і блізкім моцнага здароўя, дабрабыту, радасці, цяпла і ўтульнасці ў душах і дамах! А жыхарам раёна хачу нагадаць, што набліжаецца ацяпляльны сезон, і прапаную тым, хто не падключаны да сістэмы цэнтральнага цеплазабеспячэння, набыць паліва. Усю неабходную інфармацыю можна атрымаць па тэлефонах: 4-15-93 і 4-10-93.