І далей трымаць марку

Навучэнцаў вітае намеснік старшыні райвыканкама Ю. М. Кісялёў

1 верасня, як і ў іншых установах адукацыі раёна, урачыстая лінейка, прысвечаная пачатку новага навучальнага года, прайшла ў Пастаўскім дзяржаўным прафе­сійна-тэхнічным каледжы сельскагаспадарчай вытворчасці. У якасці гасцей на ёй прысутнічалі намеснік старшыні райвыканкама Ю. М. Кісялёў і старшыня раённай арганізацыі Беларускага прафсаюза работнікаў аграпрамысловага комплексу С. М. Герасіменка.

Пачалася лінейка па традыцыі з дзяржаўнага гімна і падняцця флага Рэспублікі Беларусь. Затым прысутных: навучэнцаў, педагогаў і бацькоў — вітаў дырэктар установы М. М. Лысёнак. Ён павіншаваў усіх са святам і адзначыў, што Пастаўскі каледж па-ранейшаму застаецца адной з самых буйных на Віцебшчыне навучальных устаноў сельскагаспадарчага профілю. Сёлета за яго парты селі амаль 400 юнакоў і дзяўчат. У вучнёўскі калектыў уліліся каля 240 першакурснікаў — выпускнікоў базавых і сярэдніх школ раёна. 50 выпускнікоў каледжа 2014 года вырашылі прадоўжыць навучанне ў родных сценах на другім узроўні на дзённай форме, яшчэ 15 — на завочнай. Каля 60 чалавек залічаны на вячэрнюю форму ў групы па падрыхтоўцы кантралёраў-касіраў, повараў і слесараў па рамонце аўтамабіляў.

— Наш каледж знаходзіцца на добрым рахунку ў вобласці, а навучэнцы дабіваюцца выдатных вынікаў на розных конкурсах і спаборніцтвах, — сказаў Мікалай Мікалаевіч. — Спадзяюся, што і ў гэтым навучальным годзе мы на сто працэнтаў зможам выкарыстаць той патэнцыял, якім валодаюць педагогі і моладзь, прадоўжыць слаўныя традыцыі ўстановы. Не забывайце, што многае ў гэтым жыцці залежыць ад нас саміх — ад нашай працы і старання.

— Вы зрабілі абсалютна пра­вільны выбар, паступіўшы ў каледж для атрымання прафесіі, — звярнуўся да першакурснікаў намеснік старшыні райвыканкама Ю. М. Кісялёў. — Ён з’яўляецца не толькі адной з самых вялікіх, але і адной з лепшых навучальных устаноў вобласці. Гэта датычыць практычна ўсіх паказчыкаў: вучэбнай работы, спартыўнага і культурнага жыцця. Тут ёсць галоўная ўмова добрага навучання — высокапрафесійныя педагогі: выкладчыкі і майстры. Думаю, на працягу вучобы ў каледжы яны стануць вашымі сябрамі, старэйшымі таварышамі і памочнікамі.

Сёння на сусветным рынку працы самымі запатрабаванымі з’яўляюцца менавіта рабочыя кадры, добра падрыхтаваныя, адукаваныя, якія дасканала валодаюць тэхнікай. У раёне, рэспубліцы, за мяжой ёсць маса магчымасцей працаўладкавацца, атрымаўшы прафесійна-тэхнічную спецыяльнасць.

— Таму вы абавязкова знойдзеце годнае прымяненне сваім сілам, уменням і ведам, было б толькі жаданне, — запэўніў усіх навучэнцаў Ю. М. Кісялёў. — Няхай гады, праведзеныя ў сценах каледжа, будуць для вас яркімі і запамінальнымі. Ну, а педагогам жадаю добрых навучэнцаў, высокіх адзнак і задавальнення ад нялёгкай працы.

Старшыня раённай арганізацыі Беларускага прафсаюза работнікаў аграпрамысловага комплексу С. М. Герасіменка ў сваю чаргу пажадаў маладым лю­дзям, каб вучоба ў каледжы была для іх першай прыступкай у прафесійным станаўленні, і ўручыў найлепшым па выніках другога семестра мінулага года навучэнцам імянныя стыпендыі абкама і райкама прафсаюза. Іх атрымалі Вікторыя Жышкевіч, Ірына Бондар і Ірына Вярцінская.

Разумных, актыўных і працавітых юнакоў і дзяўчат ва ўстанове шмат. Гэта пацвердзіла намеснік дырэктара па вучэбнай рабоце Н. А. Шылько. Яна назвала дзясяткі прозвішчаў тых, дзякуючы каму летась Пастаўскі каледж змог заняць другое месца ў вобласці па паспяховасці сярод прафесійна-тэхнічных навучальных устаноў, а таксама прозвішчы лепшых спартсменаў і ўдзельнікаў мастацкай самадзейнасці, выказаўшы на­дзею на тое, што іх колькасць на наступны год яшчэ павялічыцца. Бацькам гэтых навучэнцаў будуць адпраўлены Падзячныя пісьмы.

Пасля ўрачыстай лінейкі навучэнцы і выкладчыкі адправіліся ў вучэбныя кабінеты. А ў паня­дзелак, 8 верасня, працоўныя атрады каледжа выедуць на палі сельгаспрадпрыемстваў раёна, каб дапамагчы вяскоўцам убраць вырашчаны ўраджай. Першы працоўны семестр прадоўжыцца да 7 кастрычніка і, думаецца, будзе плённым.

Алена ШАПАВАЛАВА. Фота аўтара.