Са светлай надзеяй

Ксёндз-пробашч Мікалай Ліпскі

24 жніўня лучайская парафія сабрала вернікаў, каб памаліцца ў інтэнцыі тых, хто вучыцца, і тых, хто навучае. Як сказаў ксёндз-пробашч Мікалай Ліпскі напачатку святой Імшы: “Усе мы — вучні Школы жыцця, а Езус — наш Настаўнік. Таму сённяшняе свята датычыцца кожнага”.

Святыня была літаральна перапоўнена дзецьмі школьнага ўзросту, студэнцкай моладдзю, настаўнікамі. Усе яны сабраліся, каб папрасіць бласлаўлення на новы навучальны год. Гледзячы на іх колькасць, здзіўлялася: адкуль у вёсцы, дзе школа ўжо закрыта некалькі гадоў таму, столькі дзетак? Аказваецца: людзі прыбылі не толькі з іншых вёсак парафіі, але і арганізавана прыехалі з Пастаў, Варапаева, Шаркаўшчыны, Глыбокага, Мінска і іншых гарадоў.

З вялікім задавальненнем прысутныя слухалі нядзельнае казанне, якое прамовіў ксёндз-прэлат Павел Кнурэк з лынтупскай парафіі Святога Андрэя Апостала. Святар вельмі даступнай мовай паразважаў над значэннем малітвы «Ойча наш». Спыняючыся на кожным радку ма­літвы, ксёндз Павел падрабязна раскрываў сэнс яе слоў.

Асаблівай узнёсласці святу надало гучанне двухсотгадовага аргана. Мясцовая моладзь спявала пад суправаджэнне “караля музычных інструментаў”. Семінарыст Яўген Хаданёнак з Шаркаўшчыны, які адмыслова валодае інструментам, не застаўся незаўважаным. Ксёндз-пробашч напрыканцы святой Імшы падзякаваў арганісту за цудоўнае ўпрыгожванне Літургіі, а вернікі аддзячылі апладысментамі.

На заканчэнне святочнай Літургіі адбылося асвячэнне школьных прылад, а пасля кожны вучань, студэнт, настаўнік, выхавальнік атрымалі з рук святара Божае бласлаўленне на новы навучальны год.

Пасля святой Імшы ўсіх  чакаў канцэрт. Вядучым праграмы быў госць свята — беларускі эстрадны артыст Мікіта Фаміных. Сваімі творчымі бацькамі спявак лічыць народных артыстаў Беларусі Аляксандра Ціхановіча і Ядвігу Паплаўскую (некалькі цудоўных песень з іх рэпертуару таксама прагучалі ў праграме).

Распачаўся канцэрт з “Лучайскага гімна” ў выкананні аўтара — барда Аляксея Жбанава, які выканаў некалькі сваіх песень. Гурт “Рэха” са сваім каларытным са­лістам Андрусём Такіндангам проста запаліў публіку. Як і “залаты акардэон Беларусі” Дзмітрый Корсак, які пасля ашаламляльнага поспеху на мінулым фэсце спецыяльна да свята падрыхтаваў дзве новыя кампазіцыі. А якім жа яскравым момантам стаў феерверк каля касцёла!

Свята да Дня ведаў атрымалася вельмі цёплым, радасным, а дождж стаў Божым бласлаўленнем для Лучая. І хоць гэта апошні летні фэст сёлета, застаецца спадзявацца, што і восенню Лучай нас яшчэ парадуе.

 Алена КЛІМЗА-КОЛТАН.