Міжнародны музычны фестываль «Залаты шлягер» пачынаецца ў Магілёве

Так усё супала, што на сёлетнім «Залатым шлягеры» многае сыходзіцца на лічбе 13. "Мяркуйце самі: ён трынаццаты па ліку, адбываецца ў 2013 годзе, фінішуе канцэртам, які пройдзе 13 кастрычніка, і нават у конкурсе маладых выканаўцаў сёлета ўдзельнічаюць 13 чалавек з 13 краін", — адзначае мастацкі кіраўнік фестывалю Андрэй Каліна, але ўсё ж спадзяецца, што нешчаслівая лічба ніяк не паўплывае на лёс «Залатога шлягера» і ўсё запланаванае на ім адбудзецца найлепшым чынам.

А запланавана сёлета цікавая насычаная канцэртная праграма, якая абяцае гледачам нямала сюрпрызаў. Пра некаторыя з іх незадоўга да адкрыцця форуму Андрэй Каліна расказаў журналістам.

На фестываль вяртаецца конкурс маладых вакалістаў. Праўда, правілы зменены. Цяпер у адзін дзень удзельнікі выканаюць адразу дзве песні: хіт мінулых гадоў у сучаснай трактоўцы і прэм’ерную кампазіцыю, якую, акрамя канкурсанта, ніхто яшчэ не спяваў і якая павінна быць напісана ў лепшых традыцыях сусветнай і айчыннай песеннай культуры. Журы ўзначаліць знакаміты кіраўнік групы «На-На» Бары Алібасаў. Беларусь на конкурсе прадставіць малады таленавіты вакаліст, саліст Магілёўскай абласной філармоніі Алекша Чорны.

Дарэчы, на фестываль чакаюць пераможцу самага першага конкурсу маладых выканаўцаў «Залатога шлягера», уладальніка Гран-пры 1996 года Тэймураза Боджгуа. Зараз ён ужо вядомы спявак, жыве ў Маскве, а ў Магілёў прыедзе са сваім сябрам, колішнім салістам папулярнай групы «Электраклуб» Віктарам Салтыковым. На «Залатым шлягеры» яны будуць спяваць у дуэце.

Упершыню на фестывалі адбудзецца канцэрт зорак сусветнага і айчыннага джаза. Чакаецца, што галоўным нумарам гэтай праграмы стане выступленне вядомага амерыканскага віртуоза Стэнлі Джордана, заснавальніка ўнікальнага фартэпіяннага спосабу ігры на гітары: ён робіць гэта дзвюма рукамі, як піяніст. Цікавым для прыхільнікаў джаза абяцае быць і джэм-сэйшн беларускіх і амерыканскіх музыкантаў.

У гэтым канцэрце плануецца таксама ўнікальны прэм’ерны нумар. Арганізатары фестывалю чакаюць станоўчага адказу ад Стэнлі Джордана выступіць у дуэце з вядомай беларускай артысткай Іскуі Абалян і выканаць разам песню «Стары клён» з кінафільма «Дзяўчаты». Дарэчы, Іскуі Абалян будзе не толькі ўдзельніцай песенных праграм фестывалю, але і вядучай асноўных канцэртаў.

Своеасаблівым канцэртам-караоке стане фестывальная праграма «Застольныя песні». У суправаджэнні аркестра народных інструментаў гледачы змогуць спяваць разам з любімымі артыстамі.

Выдатны падарунак падрыхтаваны і аматарам танцавальнай музыкі. Яе таксама можна будзе не толькі паслухаць — перад сцэнай арганізуюць танцпляцоўку. У гэтай праграме зноў пасля доўгага перапынку выйдзе на сцэну некалі папулярны беларускі дуэт «ДзіБронкс і Наталі». У свой час ён распаўся, яго ўдзельнік ДзіБронкс, ён жа Дзяніс Шпітальнікаў, заняўся тэлебачаннем, а Наталі, Наталля Кудрына, стала папулярнай спявачкай Венерай. У Магілёве яны зноў збяруцца разам і выканаюць свае хіты.

Ва ўнікальным складзе прыедзе на фестываль група «Boney M». Не сакрэт, што існуюць некалькі клонаў славутага калектыву. У Магілёве чакаюць лепшае шоу з удзелам самай першай салісткі групы Мэйзі Уільямс.

Спецыяльным госцем «Залатога шлягера» стане народны артыст Расіі Юрый Антонаў (на здымку), які выступіць з сольным канцэртам. Як прызнаўся Андрэй Каліна, дамовы з артыстамі — даволі складаная частка фестывальнай падрыхтоўкі, але цяжэй за ўсё было дамаўляцца з Юрыем Міхайлавічам. Кажуць, у мінулы прыезд Антонава на «Залаты шлягер», гадоў дзесяць таму, фестывальны адміністратар, які суправаджаў артыста ў Магілёве, цалаваў перон і плакаў ад радасці, калі спявак нарэшце сеў у зваротны цягнік. Але на гэты раз, спадзяецца Андрэй Каліна, Юрый Антонаў застанецца задаволены выкананнем свайго райдэра.

Міжнародны музычны фестываль «Залаты шлягер» пройдзе з 8-га па 13 кастрычніка. Чакаецца, што ўдзел у ім прымуць артысты з 17 краін.

«Рэспубліка»