Новы крыж на магіле паўстанцаў 1863г. у в. Уладыкі (фота)

7 лістапада сябры вілейскай суполкі Таварыства аховы помнікаў гісторыі і культуры ўсталявалі новы крыж на брацкай магіле паўстанцаў 1863г. ля вёскі Уладыкі.

Стары крыж, які ставілі калісьці на пачатку 90-х гг. мінулага стагоддзя скауты з Маладзечна і вучні Сцешацкай школы, ужо спарахнеў і таму было вырашана ўсталяваць новы крыж-помнік у гонар герояў-змагароў.
Пасля ўсталявання крыж быў асвечаны пробашчам Альковіцкага касцёлу ксяндзом Анатолем. Таксама было зладжана набажэнства ў гонар загінуўшых паўстанцаў. Акцыя праходзіла з нагоды падрыхтоўкі да святкавання 150-годдзя паўстання 1863г.
Спіце спакойна, героі-змагары. Бацькаўшчына помніць пра вас!

З энцыклапедыі " Збор помнікаў гісторыі і культуры. Мінская вобласць.” Кн.1 Мн. 1987г.
"Магіла паўстанцаў 1863г. (гіст.) За 0,5 км на поўдзень ад вёскі Уладыкі, у лесе. Пахавана больш за 100 паўстанцаў атрада В.І. Козела, якія загінулі ў баі з царскімі войскамі 16(28). 5. 1863г.
У атрадзе, які сфарміраваў В.І. Козел( Козел-Паклеўскі) у Вілейскім павеце, было больш за 200 чалавек. У маі 1863г. ён знаходзіўся ў Стайкаабадоўскай пушчы, недалёка ад в. Уладыкі.
Супраць атрада былі кінуты 5 рот царскіх войск. Паўстанцы ноччу 15(27) мая пераправіліся на левы бераг р. Іліі і размясціліся ў лесе каля Уладык. Царскія войскі зайшлі ў тыл атрада. Паўстанцы ўпарта супраціўляліся, але былі акружаны і прыціснуты да ракі.
Каля 3 гадзін працягваўся жорткі бой. Слаба ўзброеныя паўстанцы біліся да апошняга. У баі загінула 120 паўстанцаў, у т.л. В.І. Козел, 50 чалавек патанулі ў рацэ, 25 трапілі ў палон.
У 1933г. на магіле паўстанцаў устаноўлена пліта.
Літ.: Архивные материалы Муравьёвского музея относящиеся к польскому восстанию 1863-64гг. в пределах Северно-Западного края. Ч. 2.- Вильна 1915.
В. Б. Караткевіч."

Зміцер Хаценчык
Фота Дзяніса Канецкага