Адзіная ў краіне вытворчасць біягазу з сывараткі пачнецца ў кастрычніку ў Вілейцы

Біягаз будуць атрымліваць на Вілейскім філіяле Маладзечанскага малочнага камбіната шляхам перапрацоўкі сывараткі і сцёкавых вод.
Пра гэта распавяла дырэктар Вілейскага філіяла «Маладзечанскі малочны камбінат» Марына Вазняк падчас візіту на прадпрыемства дэлегацыі Міністэрства прыродных рэсурсаў і навакольнага асяроддзя ў рамках X Рэспубліканскага экалагічнага форуму.
Вытворчасць біягазу з малочнай сывараткі і сцёкавых водаў - першы такі праект у Беларусі. Яго кошт - 1.970.000 еўра. Для яго рэалізацыі былі ўзятыя банкаўскія крэдыты. Паводле разлікаў спецыялістаў, праект акупіцца за 4,7 года.
Біягазавы комплекс дасць магчымасць атрымліваць каля 3000 кубічных метраў біягазу ў суткі пры перапрацоўцы 150 тон сывараткі і 100 тон сцёкавых вод. Ён будзе працаваць у аўтаматычным рэжыме. Атрыманая цеплавая і электраэнергія пойдзе на патрэбы прадпрыемства.
З 2010 года на прадпрыемстве на прыродным газе працуе кагенерацыйная ўстаноўка для камбінаванай вытворчасці цяпла і энергіі. Пасля запуску вытворчасці біягазу ўстаноўка зможа функцыянаваць і на ім. Паколькі сывартака з'яўляецца пабочным прадуктам пры вытворчасці тварагоў, сыроў і казеіну, то вытворчасць біягазу вырашыць важнае для рэгіёну пытанне ўтылізацыі і перапрацоўкі сывараткі і сцёкавых вод.
Генпадрадчыкам выступае літоўская кампанія, якая распрацавала праект. Яна ўсталюе абсталяванне, выканае пусканаладачныя работы і навучанне персаналу.
У цяперашні час будаўніцтва біяўстаноўкі
завяршаецца. Ідзе мантаж абсталявання. Плануецца, што вытворчасць біягазу пачнецца ў канцы кастрычніка гэтага года.
Юлія ЛАХВІЧ
Фота аўтара