На Вялляніным хутары пасяліўся Лесавік

У Вялейцы з'явілася скульптурная выява Лесавіка - міфалагічнага гаспадара лесу.

Лесавік з'явіўся на зямлі яшчэ адной міфалагічнай пані - на "хутары" Вялляны. Тут ён знаходзіцца недалёка ад дзіцячай пляцоўкі. Аўтар - вяляйчук Валер Апарык.
Гэты лесавік мае невялікі рост, але як вядома з паданняў, лесавікі могуць з лёгкасцю змяняць рост ад зусім малога да вышыні дрэваў.
Вось што кажа нам пра Лесавіка аўтарытэтны слоўнік "Беларуская міфалогія":
"Лесавік - У беларускай міфалогіі дух – увасабленне лесу як часткі прасторы, патэнцыйна чужой чалавеку. Кожны лясны масіў мае свайго гаспадара – Л., які апякуецца ўсімі звярамі і птушкамі (ратуе іх ад пакжару, паляўнічых і г. д.). Л. пры неабходнасці мае здольнасць павялічвацца (у лесе) і памяншацца (у полі) у памерах. Выразна прасочваецца сувязь Л. з левым бокам (левым крысом захінае правае, левая пятка наперад і г. д.)., што падкрэслівае яго апазіцыйнасць да сферы штодзённага жыцця чалавека. Дваістае стаўленне да Л. тлумачыцца як шкодай з яго боку (можна прымусіць блукаць, напалохаць чалавека, пазбавіць паляўнічай здабычы), так і дапамогай. У замовах Л. ("правялікі пан”, "справядлівы”, "цар грозны”) фігуруе як выратавальнік ад урокаў, крыксаў, згубы скаціны і нават нячыстай сілы. За паслугу з боку чалавека Л. можа надаць яму знахарскія здольнасці і спрыяць у лясных промыслах. З мэтай дасягнуць апошняга яшчэ ў канцы XIX ст. Л. прыносілі ахвяры; паляўнічыя, як і моцныя чараўнікі (Вяліжскі пав.), маліліся ў лесе.
Прасочваецца сувязь Л. з іншымі міфалагічнымі персанажамі. Будучы братам хатніку і палявіку, Л. выконвае ролю пастуха ваўкоў у дзень св. Юр’я або часам атаясамліваецца з апошнім.
Вобраз Л. быў распаўсюджаны па ўсёй тэрыторыі Беларусі, і вера ў яго служыла ўсталяванню своеасаблівай экалагічнай раўнавагі паміж Чалавекам і Прыродай (Лесам). "

Ці адпавядае новы вялейскі лесавік этнічнаму апісанню - пытанне спрэчнае, выглядае што аўтар уклада сваё ўласнае бачанне і не дужа цікавіўся асобай лесавіка. Тым ня меньш скульптура міфічнага ахоўніка лесу атрымалася, здаецца, удалай.
Л.