На Вілейшчыне маладыя згулялі вяселле ў сярэдневяковым стылі (ФОТА і ВІДЭА)

Вольга і Юры Палонскія ажаніліся два месяцы таму і абралі серэдневяковы стыль вяселля невыпадкова: ён захапляецца гісторыяй Беларусі часоў ВКЛ і ўдзельнічае ў вілейскім клубе гiстарычнай рэканструкцыi “Паходня”. Яго жонка Вольга цікавіцца народнай культурай.

– Мы пазнаёміліся банальна, праз інтэрнэт. Я знайшоў Вольгу на старонцы адной беларускай суполцы ў сацыяльнай сетцы. І так пачалі сябраваць. Самае цікавае, што потым мы спрабавалі знайсці тую суполку, дзякуючы якой пазнаёміліся, але так і не знайшлі.

У нас з Вольгай шмат агульнага. Яна цікавіцца народнай культурай, шые беларускую народную вопратку, тчэ паясы. А я захапляюся гісторыяй сярэднявечча. На мой погляд, тэма рыцарства і народнай культуры вельмі блізкія, – распавёў Край.бай Юры Палонскі.

– Чыя прапанова зрабіць такое незвычайнае вяселле?

– Гэта я прапанаваў. Бо пытанне стаяла так: ці зрабіць яго цікавым, ці проста распісацца і ўсё, – кажа суразмоўца. – Вольга не любіць белыя сукенкі, а я – пінжакі. Яшчэ думалі згуляць вяселле ў народным стылі ў вышыванках, але ўсё падрыхтаваць было вельмі цяжка, бо і там ёсць свае адметнасці. Напрыклад, мы не зусім ведалі, як правільна пашыць народную вопратку. У выніку спыніліся на стылі сярэднявечча. Гэтую тэму я добра ведаю. Бацька адразу не згадзіўся, кажа: “Не дурыце галаву і жаніцеся як усе!”. А потом як убачыў, што з гэтага атрымалася, самому спадабалася.

Да такога вяселля госці падышлі сур’ёзна, расказвае Юры. Сябры актыўна рыхтаваліся, пачалі шыць вопратку: абутак, сукенкі, кашулі, галаўныя ўборы – ўсё, як у тыя часы. Некаторыя шыліся ўвогуле дэталёва.

– З вопраткай нам дапамог клуб “Паходня”, за гэта я вельмі ўдзячны кіраўніку і астатнім хлопцам. У выніку ў нас атрымалася такое маштабнае сярэдневяковае свята. Большасць з нас прадстаўляла заможных жыхароў ВКЛ і памежных земляў. Гэта сярэдні статус жыхароў ВКЛ XIII-XV стагоддзя.

Вяселле адбылося 6-7 верасня і было прымеркавана да 8 верасня.

– Дата для нас была прынцыповая: як раз 8 верасня 1514 года ў бітве пад Воршай войска гетмана ВКЛ Канстанціна Астрожскага перамагло войска Маскоўскага княства. Гэта вельмі значная дата ў гісторыі, – адзначыў Юры Палонскі.

Маладыя распісваліся ў ЗАГСе ў Куранцы, адразу вырашыўшы, што ў Вілейскі ЗАГС не паедуць: для такого вяселля павінен быць вясковы антураж.

– Вельмі прыемна, што супрацоўнікі вясковага ЗАГСа паставіліся вельмі сур’ёзна да нашага вяселля: пераклалі сцэнар на беларускую мову, правялі для нас беларускія гульні. А мы станчылi першы шлюбны танец таксама ў сярэдневяковым стылі. Было вельмі цікава.

Сярэдневяковае вяселле Юрыя і Вольгі. Відэа

Юлія ЛАХВІЧ
Фота і відэа са старонкі Юрыя Палонскага ВКонтакте