Слонімец зарабляе ў месяц на 450 буханак таннага хлеба

Намінальны налічаны заробак слонімцаў за студзень-чэрвень склаў 2 566,2 тысячы рублёў (для параўнання: за студзень-травень — 2 489,9 тыс. рублёў). Зыходзячы з гэтых лічбаў, кашалькі слонімцаў пацяжэлі ў ліпені прыкладна на 76 тысяч.  

Калі ўтрымаць з гэтай сумы 12% падаходнага і 1% пенсійнага падаткаў, то атрымаецца рэальны сярэдні заробак — а гэта 2 232,6 тысячы рублёў. На гэтую суму жыхар Слоніма можа набыць у краме прыкладна 450 буханак самага таннага чорнага хлеба, так званых “цаглінак”. За савецкім часам на заробак у 120 рублёў рабочы мог набыць прыкладна 650 такіх буханак. Прытым кватэры, адукацыя і медыцынскія паслугі былі бясплатныя.

Сёння ж, каб дасягнуць узроўню праславутых 500 даляраў, слонімцам трэба зарабляць яшчэ амаль столькі ж.

Больш за 500 даляраў, як паведамляе Белстат, атрымліваюць толькі 7% працаўнікоў Гродзенскай вобласці. 62% афіцыйна працаўладкаваных жыхароў Гродзенскай вобласці атрымліваюць заробак ніжэйшы за налічаны па краіне. 

А як у іх?

Які сярэдні заробак у кіраўнікоў прадпрыемстваў і чыноўнікаў і ў колькі разоў ён перавышае сярэдні заробак простых працаўнікоў, на жаль, статыстыка не паведамляе. Вядома, што паводле ўстаноўкі аблвыканкама каэфіцыент суадносін заработнай платы кіраўнікоў да сярэдняй зарплаты працаўнікоў не павінен перавышаць 3. Як прааналізаваў нядаўна камітэт эканомікі Гродзенскага аблвыканкама, піша http://grodnonews.by/, ёсць кіраўнікі, які такі падыход праігнаравалі. Іншыя проста павялічылі заробак працаўнікам без уліку росту прадукцыйнасці працы на прадпрыемстве. 

Рост цэнаў не змяншае абаротаў

Ці мог слонімец, атрымаўшы ў ліпені на 76 тысяч болей, раскашэліцца на лішні кілаграм мяса ці паласавацца двума кілаграмамі заморскіх фруктаў, сказаць цяжка. Цэны толькі ў чэрвені падраслі на 1,8%. З пачатку года, паводле лічбаў Белстата, яны павысіліся на 10,5%. Прадукты харчавання за паўгода падаражэлі на 11,7%. Цана бульбы вырасла на 28,8%, хлеб — на 4,2%, цукар — на 6,8%. Падзешавеў алей — на 0,3%, проса — на 0,4%, марожаная рыба — на 0,6%, яйкі — на 0,9%.

Нехарчовыя тавары за мінулы месяц падраслі ў цане на 0,8%, а з пачатку года — на 6,9%. Лідарам па росце цэн, як азначае афіцыйная статыстыка, стаў бензін (5,3%), канцылярскія прыналежнасці і медыкаменты (21,3%), дывановыя вырабы (1,6%). Плата за камунальныя паслугі падаражэла на 7%.

Для даведкі
Месячная мінімальная зарплата за чэрвень складае па-ранейшаму Br1 млн. 47 тыс. 550, часавая мінімальная — Br6 тыс. 210.