Каму ў Слоніме цяжэй знайсці працу

Складаней за ўсё ў Слонімскім раёне знайсці працу жанчыне-гараджанцы.  

Колькасць беспрацоўных у Слонімскім раёне па стане на 1 ліпеня 2012 года склала 160 чалавек (82,1% да ўзроўню мінулага года). З іх 108 беспрацоўных пражываюць у горадзе, 52 — у сельскай мясцовасці.

Крыху больш за палову беспрацоўных складаюць жанчыны — 81 чалавек, ці 50,6%. Пры гэтым жаночае беспрацоўе, як адзначаецца на сайце Слонімскага райвыканкама, больш характэрна для горада, чым для вёскі.

Сярод беспрацоўных 55 чалавек, ці 34,4%, — гэта маладыя людзі ва ўзросце 16-29 гадоў, і 42 чалавекі, ці 26,3%, — людзі за 50 гадоў.  

Як вынікае з афіцыйнай статыстыкі, складаней за ўсё знайсці працу слонімцам, якія маюць сярэднюю агульную адукацыю. Такіх 58 чалавек, альбо 36,3%. Але і для беспрацоўных са спецыяльнай адукацыяй гэта праблема. Так, 45 чалавек, або 28,1%, з вышэйшай і сярэдняй спецыяльнай адукацыяй не могуць працаўладкавацца. З базавай адукацыяй нялёгка знайсці працу 24 беспрацоўным, ці 15%. Пры гэтым асноўная доля беспрацоўных не могуць працаўладкавацца тэрмінам да паўгода.

У першым паўгоддзі 2012 года, па звестках http://slonim.grodno-region.by, у аддзел па занятасці звярнуліся 1 766 слонімцаў. З іх 1 008 чалавек былі зарэгістраваныя як беспрацоўныя. Гэта на 101 чалавек болей, чым за аналагічны перыяд летась.

Разам з тым агульная колькасць беспрацоўных, як канстатуе сайт, змяншаецца. Аднак адметнай асаблівасцю з’яўляецца павелічэнне ў іх складзе ўдзельнай вагі асоб, якія маюць патрэбу ў дадатковых гарантыях занятасці. А гэта 22,5% беспрацоўных, якія стаяць на ўліку.

З 160 афіцыйна зарэгістраваных беспрацоўных у Слоніме (па стане на 1 ліпеня) 73 атрымліваюць дапамогу па беспрацоўі. Яе сярэдні памер — 132 145 рублёў. На гэтую суму беспрацоўны можа набыць у месяц каля 2,5 кг мяса ці прыкладна 10 пакетаў малака і 10 буханак хлеба.

P.S. Запрашаем да размовы тых, хто ў недалёкім мінулым шукаў у Слоніме працу, і падзяліцца сваім вопытам працаўладкавання, расказаць, з якімі праблемамі пры гэтым сутыкнуўся. Магчыма, вашы слушныя парады дапамогуць знайсці камусьці жаданае працоўнае месца.