Беспрацоўных у Слоніме навучаць стрыгчы і шыць

Слонімцаў, якія яшчэ не зарыентаваліся на працоўным рынку, навучаць прафесіі цырульніка, швачкі, аператара газавай кацельні і сушыльных установак, муляра-мантажніка. Групы для навучання гэтым прафесіям фармуе аддзел дзяржаўнай службы занятасці ўпраўлення па працы, занятасці і сацыяльнай абароне Слонімскага райвыканкама. 

Наогул у Слонімскім раёне колькасць вакансій перавышае колькасць беспрацоўных і па-ранейшаму застаецца галоўны попыт на рабочыя спецыяльнасці. Згодна са спісам вакансій вышэйзгаданага аддзела, на 20 чэрвеня мелася больш за 370 свабодных рабочых месцаў. Такім чынам, у Слонімскім раёне вакансій амаль удвая больш, чым афіцыйна зарэгістраваных беспрацоўных, а гэта 189 чалавек па стане на 1 чэрвеня.

Найбольш запатрабаванымі ў нашым раёне застаюцца шафёры, трактарысты, прадаўцы, слесары. Пры гэтым попыт на спецыялістаў з вышэйшай адукацыяй не перавышае дваццаці чалавек. Так, вадзіцеляў 20 чэрвеня патрабавалася больш за 30 чалавек, у той час як меліся ўсяго дзве вакансіі для людзей з юрыдычнай адукацыяй. Апошнім работадаўцы прапануюць зарплату памерам прыкладна 2 млн., кіроўцам — ад 1,6 да 2,8 млн. рублёў.

Працу цырульнікаў і швачак ацэньваюць у Слоніме адпаведна ў 2 млн. і 2,1-2,5 млн. рублёў, муляраў — ад 1,2 да 2 млн. рублёў.

Заработная плата з’яўляецца своеасаблівым паказчыкам той пашаны, што выказвае грамадства да той ці іншай прафесіі. Зыходзячы з гэтага, не ў асаблівай павазе ў Слоніме апынуліся прадаўцы і паштальёны. У іх, паводле спісу вакансій, самыя нізкія заробкі — ад 1,1 да 1,4 млн. рублёў, і пры такой аплаце праца для гэтых людзей павінна падавацца не крыніцай сродкаў, а проста хобі. У параўнанні з паштальёнамі і прадаўцамі, служба міліцыянераў па ахове ацэньваецца больш чым у два разы даражэй — ім у Слоніме абяцаюць 2,7 млн. рублёў. 

Найбольшую суму работадаўцы гатовы заплаціць ветдоктару і галоўнаму аграному аднаго з СВК раёна — па 3,5 млн. рублёў. Але і зарплата гэтых спецыялістаў адчувальна недацягвае да праславутых 500 даляраў, на якія да канца года зноў нацэльвае кіраўнік краіны.

Самую вялікую зарплату слонімцам прапануе, згодна з рэкламнай аб’явай у “Газеце Слонімскай”, адна з будаўнічых фірмаў — ад 11 млн. рублёў. Гэта амаль тысяча еўра. Праўда, працаваць за такія грошы прыйдзецца ў Расіі.