Пікет у падтрымку “Газеты Слонімскай” і крос-віктарына “Знай свой край” не памясціліся ў гарадскім парку

Днямі слонімскі грамадскі актывіст Алесь Масюк атрымаў адказ з райвыканкама на сваю заяўку аб правядзенні ў Слоніме пікета за права жыхароў Слонімшчыны свабодна афармляць падпіску на “Газету Слонімскую” ў паштовых аддзяленнях і купляць яе ў кіёсках “Белсаюздруку”.

Пікет планавалася правесці ў гарадскім парку на вуліцы Опернай (адзінае вызначанае ўладамі месца для масавых мерапрыемстваў)  у нядзелю, 29 верасня, з 11.00 да 16.00. “Згодна з планам работы аддзела ідэалагічная работы, культуры і па справах моладзі Слонімскага раённага выканаўчага камітэта, РК ГА “БРСМ” 29 верасня 2013 г. у 12.00 у гарадскім парку па вул.Опернай пачатак традыцыйнай крос-віктарыны “Знай свой край”, — інфармуе цыдулка за подпісам старшыні райвыканкама Іосіфа Паўлюкевіча. З такога адказу можна падумаць, што слонімскі гарадскі парк настолькі малы, што не змесціць пікетоўшчыкаў і ўдзельнікаў уладнага мерапрыемства. Але гэта, натуральна, не так — у парку палове горада месца хапіла б.

Чарговая фармальная адпіска заяўляльніку пра пікет ізноў засведчыла, што чытачам і выдаўцу “Газеты Слонімскай” улады не збіраюцца вяртаць права падпіскі на пошце і распаўсюду газеты праз  шапікі “Саюздруку”, адабранае яшчэ ў 2006 годзе. Казаць пра роўныя ўмовы дзейнасці СМІ ў Беларусі з таго часу і па сёння — не выпадае.

Нашы чытачы перыядычна падпісваюцца пад зваротамі ўключыць “Газету Слонімскую” ў падпісны каталог “Белпошты” і дазволіць прадаваць яе ў газетных кіёсках. Пісьмы з падпіснымі лістамі накіроўваюцца ў розныя інстанцыі, уключна з Адміністрацыяй прэзідэнта РБ. У адказ — ігнараванне законных патрабаванняў і фармальныя адпіскі.

Але людзі працягваюць адстойваць тут свае правы. І гэта дадае аптымізму.