Слонімец наведаў Нарвегію

Нядаўна беларуская дэлегацыя прадстаўнікоў аргкамітэта па стварэнні партыі "Беларуская Хрысціянская Дэмакратыя", у складзе якой быў слонімец Іван Бядко, наведала Нарвегію.

Хрысціянска-дэмакратычная партыя Нарвегіі (KrF) запрасіла сваіх беларускіх партнёраў пазнаёміцца з ходам перадвыбарчай кампаніі ў парламент, выбары ў які адбудуцца 9 верасня.

Беларусы мелі магчымасць прыняць удзел у святочных мерапрыемствах і даведацца пра разнастайныя выбарчыя тэхналогіі.

Пасля вяртання на радзіму Іван Бядко коратка падзяліўся з карэспандэнтам “ГС” сваімі ўражаннямі ад паездкі.

—Усё пачалося з таго, што мы прызямліліся ў горадзе Крысціансанд на беразе мора і праехалі амаль праз усю Нарвегію. Мяне ўразіла прырода Нарвегіі з яе скаламі, паселішчы на скалах, узбярэжжа, чыстыя, добраўпарадкаваныя гарады і дарогі, шматлікія тунэлі і шмат іншага.

Першы наш прыпынак быў у горадзе Арэндаль, дзе партыя KrF ладзіла адкрыццё выбарчай кампаніі. Прадстаўленне партыі і яе кандыдатаў на будучых выбарах ператварылася ў сапраўднае свята дэмакратыі. Наша дэлегацыя ўдзельнічала ў розных семінарах, перадвыбарчых мерапрыемствах, сустрэчах з кандыдатамі ў дэпутаты і ў іншых мерапрыемствах.

Мяне вельмі здзівіла, што ў часе правядзення розных масавых вулічных мерапрыемстваў я не ўбачыў ніводнага паліцэйскага і што ўсё праходзіла прыстойна і спакойна.

Мы таксама наведалі горад Ставангер і мелі сустрэчы з кандыдатамі на парламенцкія выбары ад рэгіёна Рагаланд і дзейнымі дэпутатамі рэгіянальнай рады Рагаланда. Наведалі розныя выбарчыя ўчасткі для галасавання і ўбачылі, як там праходзіць датэрміновае галасаванне. Там членам выбарчых камісій нават у галаву не прыходзіць думка, каб нешта падтасаваць і падмануць выбаршчыкаў.

Вельмі спадабалася паездка ў Нарвегію. Я атрымаў шмат пазітыўных уражанняў, добры досвед і палітычны вопыт. Там я пазнаёміўся з сапраўднай дэмакратыяй, — зазначыў Іван Сямёнавіч.

Фото з архіва Івана БЯДКО