Пераможцы “Залатога коласа” – футбалісты з Васілішак

Барацьба за званне чэмпіёнаў вобласці разгарнулася не на жарт сур’ёзная. Матчы прайшлі надзвычай цікава і напружана, ніводная з каманд не хацела саступаць. Да апошняга моманту немагчыма было вызначыць лідара. У фінале каманда Шчучынскага раёна перамагла з лікам 3:1 футбалістаў са Слоніма і тым самым заваявала званне мацнейшай. Другое і трэцяе месцы занялі адпаведна спартсмены Карэліцкага і Гродзенскага раёнаў. Прызёры атрымалі кубак, медалі, граматы і грашовыя ўзнагароджанні.

— Я вельмі ганаруся сваімі выхаванцамі! – гаворыць трэнер каманды па футболе Шчучынскага раёна Генадзій Андрэевіч Аксціловіч. – Першыя два матчы фіналу прайшлі для нас не вельмі ўдала: мы саступілі з лікам 2:1 камандам Гродзенскага і Смаргонскага раёнаў. Аднак рабяты не страцілі веры ў сябе, таму і перамаглі! Яны па праве лічацца мацнейшымі футбалістамі Гродзеншчыны!

— Наша каманда па футболе трэці год запар становіцца мацнейшай у вобласці! — дзеліцца начальнік аддзела фізічнай культуры, спорту і турызму райвыканкама Іван Вікенцьевіч Гваздоўскі. — У поспехах васілішкаўскіх спартсменаў заслуга і дырэктара ААТ “Васілішкі” Уладзіміра Часлававіча Серахана, які надае вялікую ўвагу папулярызацыі спорту сярод моладзі і аказвае фінансавую дапамогу: на сродкі гаспадаркі рабятам набываюцца абанементы ў басейн, выдзяляецца транспарт для ўдзелу ў розных спаборніцтвах…
Дарэчы, сёння ў Гомелі пачаўся фінал рэспубліканскага этапа спаборніцтваў “Залаты колас”, дзе футбалісты з Васілішак абараняюць гонар Гродзенскай вобласці. Застаецца толькі пажадаць рабятам удачы і новых перамог. Балеем за нашых!

Аляксандр КАСПЯРЧУК.
Фота аўтара.