Па жыцці – з годнасцю

Кампетэнтны, сур’ёзны, адказны, добразычлівы, прынцыповы, добры арганізатар – гэта ўсё пра Альберта Львовіча Смірнова. Яго былыя падначаленыя, калегі і таварышы, з кім давялося гутарыць, называлі менавіта гэтыя высокія дзелавыя і чалавечыя якасці.

Так, начальнік аддзела грамадскага харчавання, старшыня савета ветэранаў райспажыўтаварыства Ніна Аляксееўна Яцкевіч расказала, як Альберт Львовіч – патрабавальны і строгі – гарой стаяў за сваіх маладых супрацоўнікаў перад абласным кіраўніцтвам, не даваў іх у крыўду, усю адказнасць браў на сябе. “Сам акуратны, пунктуальны, адказны ў рабоце, Альберт Львовіч такіх жа адносін да працы патрабаваў і ад іншых”, – кажа Ніна Аляксееўна. Слова гэтай жанчыны важкае, бо яна з тых ветэранаў спажывецкай кааперацыі раёна, каго старшыня праўлення Смірноў у свой час браў на работу, чые ініцыятыву і прафесійнае станаўленне падтрымліваў, каго вылучаў на сур’ёзныя пасады.

У жыцці 85-гадовага юбіляра былі не толькі мірныя шчаслівыя вёсны. Быў час выпрабаванняў – вайна.

... 15-гадовы Альберт, які жыў са сваімі роднымі ў мястэчку Дзярэчын Зельвенскага раёна, на другі дзень Вялікай Айчыннай вайны па волі абставін стаў... сынам палка. Былі адступленне, цяжкія баі, пагроза акружэння... З вінтоўкай, вышэйшай за яго, хлопец прайшоў з палком ажно да Падмаскоўя. Потым камандзір вайсковага падраздзялення настаяў, каб малалетні баец адправіўся ў тыл. А ўжо ў 1943-ім, “дабраўшы” гадоў, Альберт Смірноў стаў байцом дзеючай арміі і быў накіраваны на Далёкі Усход. Медалі “За перамогу над Японіяй”, “За вызваленне Карэі” – як напамін аб тых суровых часінах. Акрамя іх, Альберт Львовіч узнагароджаны медалём “За баявыя заслугі”, ордэнам Айчыннай вайны ІІ ступені. За працоўную дзейнасць адзначаны ордэнам Працоўнага Чырвонага Сцяга, ёсць і іншыя ўзнагароды.

Вайна выпрабоўвала гэтага чалавека не толькі на фронце. Ранай на ўсё жыццё стала смерць родных: гітлераўцы расстралялі бацькоў, брат загінуў у партызанскім атрадзе...

Энергічны, рухавы, добразычлівы – такі Альберт Львовіч Смірноў у свае восемдзесят пяць. Вельмі любіць унукаў, якія, дарэчы, аддзячваюць дзядулю такім жа ўзаемным пачуццём. А яшчэ наш герой не адмяжоўваецца ва ўласным мірку, не закісае ў быце, а актыўна ўдзельнічае ў грамадскім жыцці. Актыўную жыццёвую пазіцыю і незаспакоенасць ветэрана адзначыў і старшыня раённага савета ветэранаў Эдмунд Станіслававіч Дзікевіч: “Альберт Львовіч – член райсавета ветэранаў і яго прэзідыума. Працяглы час узначальваў камісію па сацыяльна-бытавых пытаннях. На яго рахунку – шмат добрых спраў”.

Гэта – толькі штрыхі да партрэта дастойнага чалавека і грамадзяніна. Яго жыццёвая філасофія, яго мудрасць, спадзяемся, стануць падставай для будучай сустрэчы. А пакуль што – з юбілеем, паважаны Альберт Львовіч! Здароўя і дабрабыту Вам на доўгія гады!
Таццяна ПАЛУБЯТКА.
Фота Аляксея БІБІКАВА.