На жніве працуюць… вайскоўцы

Станіслаў Станіслававіч Кузьма значную частку свайго жыцця прысвяціў службе ў арміі. Пасля звальнення ў запас вырашыў падацца ў аграрыі.

– Яшчэ ў юнацтве я cкончыў Навагрудскі сельгастэхнікум, затым – Гродзенскі сельскагаспадарчы інстытут, – гаворыць загадчык вытворчага ўчастка №1 ДП “Шчучынская ППРф” Станіслаў Станіслававіч Кузьма. – Некаторы час працаваў у калгасе “Чырвоны сцяг” у Балічах. Потым вырашыў стаць вайскоўцам: болей дваццаці гадоў прысвяціў службе ў арміі і выйшаў на заслужаны адпачынак у званні старшага прапаршчыка. У мінулым годзе разам з сям’ёй вярнуўся на малую радзіму – у вёску Амбілеўцы. Я люблю працаваць на зямлі, таму ўладкаваўся на працу ў мясцовую гаспадарку. Сёлета збіраю свой першы пасля доўгага перапынку ўраджай.

Шчучынскай ППРф сёлета неабходна ўбраць 1200 гектараў зерневых. З кожным днём тэмпы жніва ўзрастаюць. Аднак рабіць прагнозы аб ураджаі ў гаспадарцы не спяшаюцца. Як вядома, хлеб не той, што на палях, а той, што ў засеках. Аднак першыя вынікі радуюць – асобныя ўчасткі азімага трыцікале далі па 70 цэнтнераў з гектара.

Жніво ў ДП “Шчучынская ППРф” пачалося, як у арміі – франтальным наступленнем на нівы. На ўборцы зерневых задзейнічаны 7 камбайнаў, у тым ліку і магутны “Лексіён”. Тон у рабоце задаюць вопытныя механізатары Андрэй Віктаравіч Місюк, Вацлаў Станіслававіч Сінкевіч, Віктар Баляслававіч Філіпчык, браты Віктар Юзэфавіч і Іосіф Юзэфавіч Арабчыкі. Сілы не разрозніваюць – камбайны ідуць цэнтралізавана, за кожным з іх замацаваны аўтамабілі-перавозчыкі. Тут жа дзяжураць тэхнічныя службы, пажарныя.

– Працаваць на сяле можна, – дзеліцца механізатар з дваццацігадовым стажам Віктар Баляслававіч Філіпчык, прама пасярод загона на хвіліну спыніўшы па нашай просьбе свой камбайн. – Паглядзіце якая тэхніка! За апошнія некалькі гадоў у гаспадарцы значна абнавіўся машынна-трактарны парк, прычапны інвентар. Люба-дорага выходзіць у поле на сучасных высокапрадукцыйных машынах: за рабочым працэсам сочыць бартавы камп’ютар, у кабіне вадзіцеля ўстаноўлены кандыцыянер… Ды і зарплаты досыць высокія!

Рытм уборачнай кампаніі ў ДП “Шчучынская ППРф” вельмі напружаны, работа на палях вядзецца з васьмі гадзін раніцы і не спыняецца да позняй ночы. Ужо скончана ўборка азімага рапсу, ураджайнасць якога склала 25 цэнтнераў з гектара. Яравога ячменю намалочана 357 тон, азімай пшаніцы - 578 тон. Калі надвор’е не падвядзе, жніво ў гаспадарцы будзе завершана да 15 жніўня.
Аляксандр КАСПЯРЧУК.
Фота аўтара.