Захаваем спадчыну разам!

Як не дапусціць знішчэння помнікаў археалогіі, што знаходзяцца на тэрыторыі раёна? Як зрабіць гэтыя аб’екты прывабнымі для турыстаў? Як утаймаваць “чорных капальнікаў”? Гэтыя і шматлікія іншыя пытанні разглядаліся на чарговым пасяджэнні міжведамаснага каардынацыйнага савета Шчучынскага райвыканкама па захаванні гісторыка-культурнай спадчыны.

– Для таго, каб дакладна нанесці на карту месцазнаходжанне археалагічных помнікаў, мы аб’ехалі ўвесь раён, – гаворыць метадыст раённага метадычнага цэнтра народнай творчасці Таццяна Віктараўна Пятрова. – З 25 аб`ектаў было лакалізавана толькі 16. Астатнія 9, на жаль, не захаваліся.

– Па колькасці і стане археалагічных помнікаў Шчучыншчына ўваходзіць у тройку лідараў сярод іншых раёнаў Гродзенскай вобласці, – сцвярджае дацэнт кафедры археалогіі і этналогіі Гродзенскага дзяржаўнага ўніверсітэта імя Я. Купалы Генадзь Мікалаевіч Семянчук. – Кульбачына, Турэйск, Берагоўцы, Галынка, Сырні… Па ўсёй Шчучыншчыне “раскіданы” помнікі археалогіі, і гэтае багацце вельмі важна захаваць для нашчадкаў. Неабходна, каб мясцовая ўлада ведала аб існаванні на тэрыторыі сельсаветаў курганоў і сачыла за іх станам, не дапускала разворвання. Карысна будзе звярнуцца па дапамогу да школьнікаў – яны з задавальненнем прымуць удзел у суботніках, навядуць парадак на тэрыторыі таго ці іншага помніка археалогіі… У такіх месцах трэба абавязкова ўстанавіць ахоўныя дошкі, кожны месяц праводзіць маніторынг! Такім чынам, крок за крокам, помнікі “ажывуць”, пачнуць новае жыццё… Як толькі да курганоў пачнуць прыязджаць людзі, знікне праблема “чорных капальнікаў”, ад якіх так пакутуюць аб’екты археалогіі. У раён хлынуць турысты, навукоўцы, археолагі…

–Мы правялі поўную інвентарызацыю раней занесеных у дзяржаўны спіс помнікаў археалогіі, якія знаходзяцца на тэрыторыі Шчучыншчыны, – працягвае Генадзь Мікалаевіч. – На кожны аб’ект быў складзены пашпарт і заведзена спецыяльная картка. Хутка ўсе гэтыя дакументы адправяцца ў Мінск для рэгістрацыі.

Намеснік старшыні райвыканкама Ганна Станіславаўна Хвядзюк падзякавала прысутным за праведзеную работу. Напрыканцы сустрэчы члены савета абмеркавалі патрабаванні заканадаўства аб ахове гісторыка-культурнай спадчыны ў адносінах да помнікаў археалогіі і вызначылі шляхі далейшай работы.
Аляксандр КАСПЯРЧУК.