Народныя танцы ды музыка ў Берасце - Зюзя Club

Зюзя Club - гэта берасцейскі клуб аматараў этнічнай культуры, найперш музыкі ды танцаў. Мы таксама цікавімся тым, як нашыя продкі ў сваю маладосць бавілі час, якія былі гульні, святы, абрады, карагоды. З аднаго боку гэта ўсё весела і пазнавальна, з іншага - мы клапоцімся, каб не разрывалася сувязь паміж пакаленнямі. Народ жыве і квітнее толькі да той пары, пакуль яго культура жыве ў штодзённай практыцы. У гэтым плане мы ўжо згубілі вельмі шмат, на жаль.

Аднак мы цудоўна разумеем, што захаваць і адрадзіць народную спадчыну ў цалкам аўтэнтычным выглядзе ўжо немагчыма - іншы час, іншы лад жыцця, іншая прастора. Таму мы стараліся знайсці такія формы, якія былі б цікавыя найперш сучаснай моладзі. Этнічныя танцы і гульні, іншыя абрадавыя забавы ў гэтым плане сталі сапраўднай знаходкай. Што ні кажы - дзяды ведалі як уволю павесяліцца ў час, калі не было ні інтэрнэту, ні нават тэлевізараў. І нам ёсць чаму ў іх павучыцца. 

Першая вечарына прайшла напрыканцы верасня. У танцавальным клубе мы сабралі каля 90 чалавек, запрасілі музыкаў, паказалі некалькі прыкладаў старадаўніх гульняў (цяцерку, ўдаўца). Адносна невялікі танцавальны зал Гарадскога дома культуры ледзьве ўмясціў усіх ахвочых. Для карагодных танцаў даводзілася рабіць некалькі колаў, для шэрагаў цяцеркі не хапіла даўжыні залы - давялося ставаць па дыяганалі. Тады мы зразумелі, што сучаснай моладзі сапраўды вельмі не хапае падобных забаваў. Для кагосьці гэта вяртанне да традыцый, для іншых - незвычайная "фішка", забытая экзотыка. Але ў любым разе гэта быў поспех: ідэя, якая найперш рабілася для саміх сябе, спрацавала ўдала і зацікавіла іншых.

Да нас пачалі звяртацца людзі і калектывы, якія займаліся падобнай тэмай, прапаноўваць свае ідэі, веды, магчымасці. Першапачаткова мы думалі, што калі ўсё будзе добра, зладзім падобную вечарыну яшчэ раз бліжэй да калядаў, а пакуль паназапашваем інфармацыю, ўзбагацім танцавальную праграму, самі патрэніруемся. Але, атрымалася, што наступная вечарына ладзіцца ўжо ў лістападзе, сумесна з танцавальным гуртом "Берасцейскі замак" і музыкамі "Cad Goddeu". У нядзелю, 24 чысла наведвальнікаў чакаюць яшчэ болей этна танцаў, гульняў, забаў. А для самых актыўных і зацікаўленых мы плануем зладзіць некалькі рэпетыцый. Спадзяемся, што цікавасць да гэтай тэмы будзе толькі расці.

Запрашаем усіх, хто хоча далучыцца і на саму імпрэзу, і на нашую інфармацыйную старонку: https://vk.com/ziuzia_club