В добрый путь, выпускники! У вас всё получится! (+фото)

Апошні званок, які прагучаў у школах Пастаўшчыны 30 мая, абвясціў 279 выпускнікам пра пачатак новага жыццёвага этапа. Закончыўся шлях дзяцінства, наперадзе тысячы нязведаных дарог. На якія з іх ступяць адзі­наццацікласнікі, пакажа час. Пакуль жа іх думкі ў родных школах, родных класах, разам з самымі роднымі настаўнікамі…

З дзяцінствам развітвацца сумна. Напэўна, таму так часта блішчэлі слёзы на вачах выпускнікоў, якія сабраліся на раённым свяце апошняга званка. Па традыцыі ўрачыстасць адбылася на цэнтральнай гарадской плошчы і выклікала ў яе герояў шэраг невыказных эмоцый.

…Ляцяць увышыню рознакаляровыя шары. А разам з імі — мары і надзеі выпускнікоў. Іх здзяйснення ў той вечар пажадалі многія. Першым гэта зрабіў старшыня райвыканкама Віктар Сяргеевіч Гутараў.

—         Зусім хутка ў вас пачнецца новае дарослае жыццё, — адзначыў ён у прывітальным слове. — Парты зменяць студэнцкія аўдыторыі, прамысловыя і сельскагаспадарчыя прадпрыемствы. Упэўнены, вы годна прадоўжыце справы сваіх папярэднікаў і зробіце наш край яшчэ лепшым і прыгажэйшым. Жадаю мудрасці, цярпення, дабрыні і, несумненна, поспехаў на экзаменах. У добры шлях!

Віктар Сяргеевіч таксама ўручыў пераможцам абласных і рэспубліканскіх прадметных алімпіяд, іх бацькам і настаўнікам-прадметнікам падзячныя пісьмы і грашовыя прэміі. Іх атрымалі Надзея Дзямідка, Таццяна Машніч (СШ №1), Ганна Пракаповіч (СШ № 2), Максім Данілаў (Лынтупская ЯС-СШ), Кацярына Дунец, Андрэй Кавалёнак (раённая гімназія), Таццяна Харко (Варапаеўская СШ) і іншыя разумнікі.

Самых актыўных, ініцыятыўных і адказных школьнікаў заахвоціў і райкам ГА “БРСМ”. Яго першы сакратар Іна Каралёва ўручыла прадстаўнікам пярвічных арганізацый раёна Ганаровыя граматы.

Але не толькі школьнікі былі ў той вечар у цэнтры ўвагі. Старшыня райвыканкама В. С. Гутараў і начальнік аддзела адукацыі райвыканкама А. Я. Кашырын уручылі заслужанаму настаўніку Рэспублікі Беларусь, дырэктару Дунілавіцкай сярэдняй школы Васілію Аляксандравічу Бульбянову Ганаровыя граматы раённага выканаўчага камітэта, абласнога ўпраўлення і раённага аддзела адукацыі, каштоўны падарунак ад райкама прафсаюза.

Дэлегацыя гэтай школы была адной з самых шматлікіх — сёлета тут выпускаюць 28 маладых людзей.

—         Настрой выдатны, — падзялілася ўражаннямі ад раённага свята адзінаццацікласніца з Дунілавіч Ірына Хоміч. — Разам з атэстатамі мы атрымалі і вадзіцельскія правы катэгорыі “B”. Упэўнена, яны адкрыюць нам шмат новых магчымасцей. Якія планы? У першую чаргу — паспяхова здаць экзамены і паступіць у ВНУ. Верым: у нас усё атрымаецца!

Перапаўнялі пачуцці і настаўнікаў.

—         У гэтай школе я выпускаю ўжо чацвёрты выпуск, — расказала класны кіраўнік СШ № 4 Святлана Мікалаеўна Райчонак. — Магу ўпэўнена сказаць: я шчаслівы настаўнік. Мяне памятаюць мае шматлікія вучні, мы часта сустракаемся як самыя найлепшыя сябры. Так бу­дзе і з гэтым выпускам. Але ўсё роўна сумна адпускаць іх у самастойнае жыццё. Сёння на лінейцы не магла стрымаць слёз: не верылася, што мае дзеці выраслі і пакідаюць школу. Яны ж для мяне як родныя. Буду вельмі хвалявацца за іх.

Увесь вечар грымела свята на плошчы. Яго шчаслівы настрой дапамаглі стварыць юныя спевакі і танцоры раённага цэнтра дзяцей і моладзі, школ горада і раёна і іншыя выканаўцы, якія падарылі прысутным музычныя і танцавальныя нумары. Гэтаму спрыяла і добрае надвор’е. Падчас мерапрыемства хмары нібы расступіліся над выпускнікамі. “Вельмі пашанцавала,” — казалі яны. Думаецца, не ў апошні раз!

Іна СНЯЖКОВА.

Фота аўтара і Пятра Курыловіча.