Поставы посетил заместитель министра труда и социальной обороны Валерий Валерьевич Ковальков

В. В. Кавалькоў падчас наведвання аддзялення сацыяльнай адаптацыі, рэабілітацыі і дзённага знаходжання інвалідаў.

24 мая ў памяшканні раённага выканаўчага ка­мі­тэта адбыліся “прамая лінія” і асабісты прыём грамадзян, якія правёў намеснік міністра працы і сацыяльнай абароны Валерый Валер’евіч Кавалькоў.

На Пастаўшчыне налічваецца больш за 12 тысяч пенсіянераў, якія стаяць на ўліку ва ўпраўленні па працы, занятасці і сацыяльнай абароне райвыканкама. Аднак з пытаннямі, якія датычаць пенсійнага забеспячэння і насілі прыватны характар,  звярнулася ўсяго 5 чалавек. На кожнае В. В. Кавалькоў, кіруючыся дзеючым заканадаўствам, даў вычарпальныя адказы. Пры гэтым параіў часцей заглядваць у памятку, якая змешчана ў пенсійным пасведчанні. У прыватнасці, звярнуў увагу на тое, што пенсіянеры ў выпадку паступлення на працу ці звальнення з яе, змяшчэння на поўнае дзяржаўнае ўтрыманне, змены месца жыхарства і пры іншых абставінах абавязаны паведамляць пра гэта  органу, які выплачвае ім пенсію.

На пытанне карэспандэнта “Пастаўскага краю” пра павышэнне працоўных пенсій у 2013 годзе намеснік міністра адказаў, што калі будзе расці заработная плата, то будуць расці і пенсіі. Рашэнне аб павышэнні пенсій улады будуць прымаць, таксама зыходзячы з магчымасцей Фонду сацыяльнай абароны насельніцтва, які з’яўляецца асноўнай крыніцай фінансавання пенсійных выплат.

У адрозненне ад 2012 года сёлета штоквартальны пераразлік працоўных пенсій не праводзіцца. Разам з тым, працоўныя мінімальныя і сацыяльныя пенсіі, а таксама надбаўкі, павышэнні і даплаты, устаноўленыя да пенсій асобным катэгорыям пенсіянераў, будуць пераразлічвацца кожны квартал у сувязі з павышэннем бюджэту пражытачнага мінімуму.

Намеснік міністра працы і сацыяльнай абароны наведаў у Паставах аддзяленні кругласутачнага знаходжання і сацыяльнай адаптацыі, рэабілітацыі  і дзённага знаходжання інвалідаў тэрытарыяльнага цэнтра сацыяльнага абслугоўвання насельніцтва, гутарыў з  кіраўніцтвам, пражываючымі і наведвальнікамі ўстаноў.

Фота Пятра КУРЫЛОВІЧА.