Окрылила и вдохновила «Радость слова»

З 23 па 28 красавіка па благаславенні архіепіскапа Полацкага і Глыбоцкага Феадосія ў Паставах прайшла праваслаўная выстава-кірмаш “Радасць Слова”.

На працягу шасці дзён на галоўнай плошчы горада працаваў выставачны павільён, пры адкрыцці і закрыцці якога двойчы на дзень гучалі званы. Тут прай­шлі ўрачыстыя адкрыццё і закрыццё выставы, выступленне лаўрэата міжнародных конкурсаў — мужчынскага вакальнага ансамбля “Благавест”. Благачынны цэркваў Пастаўскай акругі протаіерэй Валерый Пашкевіч адслужыў малебны. Тут адбылася і галоўная падзея: выканаўчы дырэктар Міжнароднага дабрачыннага фонду і каардынатар рэспубліканскай духоўна-асветніцкай праграмы “Сям’я. Яднанне. Айчына” Канстанцін Уладзіміравіч Яскевіч ад імя выдавецтва Беларускага Экзархата перадаў факсі­мільнае выданне “Слуцкага Евангелля” айцу Валерыю, а той, у сваю чаргу, —  намесні­ку старшыні  райвыканкама Ю. М. Кісялёву. Юрый Мікалаевіч падзякаваў за каштоўны падарунак і адзначыў, што “Слуцкае Еван­гелле”  будзе захоўвацца ў цэнтральнай раённай бібліятэцы і стане даступным для ўсіх наведвальнікаў.

Прысутныя ўважліва слухалі выступленне К. У. Яскевіча пра гісторыю стварэння, рэстаўрацыю і выданне ўні­кальнага рукапіснага помніка ХVІ стагоддзя. Гэта адна з праваслаўных святынь Беларусі па праву лічыцца такім жа сімвалам духоўнага адраджэння нацыі, як Крыж Прападобнай Еўфрасінні Полацкай. Евангелле было напісана ў 1581 годзе ўласнаручна  слуцкім князем Юрыем Алялькові­чам. Сярод нешмат­лікіх старажытных рукапісных выданняў гэта адзі­ны прыклад у Беларусі, калі над кнігай працаваў не просты манах-перапісчык, а знатны магнат.

“Слуцкае Евангелле” лічылася бясследна страчаным падчас Вя­лікай Айчыннай вайны 1941-1945 гадоў. Аднак увесь пасляваенны перыяд яно знаходзілася на тэрыторыі Беларусі ў адной сям’і. У пачатку 90-ых гадоў святыня была перада­дзена прыхаджанкай настаяцелю аднаго са сталічных храмаў у знак падзякі за адпяванне памерлага родзіча.  Жанчына нават не ўяўляла значнасці кні­гі. Цяпер “Слуцкае Еван­гелле”знаходзіцца ва ўласнасці Беларускай  праваслаўнай Царквы. У 2009 годзе выдавецтва Беларускага Экзархата ажыццявіла яго факсімільнае выданне, якое з’яўляецца практычна дакладнай копіяй рукапісу.

“Слуцкае Евангелле” разам з іншымі факсі­мільнымі выданнямі кніжных шэдэўраў —  “Полацкім Евангеллем”, “Жыціем блажэннай Еўфрасінні, ігуменні манастыра ў г. Полацку” — было прадстаўлена ў Паставах на выставе-кірмашы  ў экспазіцыі “Вяртанне святынь”.  На іншых стэлажах і вітрынах размяшчаліся духоўная, адукацыйная і дзіцячая літаратура, дыскі з духоўнымі песнямі і музыкай, мастацкімі і відэафільмамі, фільмамі для дзяцей, падарачныя наборы Бібліі, царкоўнае начынне  і іншая прадукцыя  выдавецтва Беларускага Экзархата.

Духоўна-асветніцкая праграма не абмяжоў­валася работай павільёна, праваслаўнай выставай-кірмашом. Тут праходзілі гутаркі святароў з наведвальнікамі, дэманстраваліся фільмы, праводзіліся  іншыя мерапрыемствы духоўнага кірунку. Перад ідэалагічнымі і педагагічнымі работнікамі, ваеннаслужачымі Асобнага авіяцыйнага атрада, гімназістамі, прадстаўнікамі іншых калектываў выступілі намеснік дырэктара інфармацыйна-аналітычнага цэнтра пры Адміністрацыі Прэзідэнта Рэспублікі Беларусь, доктар філасофскіх навук, прафесар Л. Я. Крыштаповіч, прафесар кафедры ідэалагічнай работы Ваеннай акадэміі Рэспублікі Беларусь І. В. Саблін, супрацоўнік цэнтра аховы мацярынства і сямейных каштоўнасцей Беларускай праваслаўнай Царквы, кандыдат медыцынскіх навук, урач-гінеколаг Г. В. Жыгунова. Падчас лекторыяў разглядаліся актуальныя праблемы развіцця сучаснага грамадства, пытанні нацыянальнай самасвядомасці і духоўна-маральных каштоўнасцей, сямейных адносін і іншыя.

На працягу тыдня жыхары горада і раёна змаглі далучыцца да свету праваслаўнай духоўнасці,  праявілі актыўнасць і нераўнадушнасць, даказалі, што, нягледзячы на высокую інфармацыйную насычанасць, духоўнае слова і кніга маюць вялікае значэнне ў духоўным развіцці чалавека.

Тэкст і фота Пятра КУРЫЛОВІЧА.