В Поставах прошли соревнования по плаванию среди трудных подростков

27 красавіка на базе фізкультурна-аздараўленчага комплексу, што ў мікрараёне пятага гарадка, адбыліся спаборніцтвы па плаванні сярод цяжкіх падлеткаў. Маладыя людзі, якія стаяць на ўліку ў інспекцыі па справах непаўналетніх і ўнутрышкольным кантролі, даказалі: са спортам яны ў выдатных стасунках.

Мерапрыемства адбылося дзякуючы ініцыятыве першага сакратара райкама ГА “БРСМ” Іны Каралёвай і начальніка інспекцыі па справах непаўналетніх РАУС Вячаслава Людвігавіча Врублеўскага. Іх  падтрымалі ў ад­дзелах фізкультуры, спорту і турызму і па справах моладзі райвыканкама, забяспечыўшы пляцоўкай для спабор­ніцтваў і сувенірамі.

Свята спорту і здаровага ладу жыцця сабрала 19 падлеткаў з кожнай гарадской школы і пастаўскага прафесійна-тэхнічнага каледжа. Пачалося яно з прывітальнага слова намесніка старшыні райвыканкама Юрыя Мікалаевіча Кісялёва:

—         Ні для кога не сакрэт, што плаванне — адзін з самых спрыяльных для зда­роўя відаў спорту, — адзначыў ён. — Яно цудоўна загартоўвае арганізм, спрыяе прафілактыцы шматлікіх захворванняў. Такія спабор­ніцтвы  не толькі цікавыя, відовішчныя, але і надзвычай карысныя. У Паставах створаны ўсе ўмовы для іх правя­дзення, таму, упэўнены, што яны будуць ладзіцца і надалей.

Галоўным суддзёй мерапрыемства выступіў В. Л. Врублеўскі. Рассудзіць плыўцоў пасля першага заплыву на 50 м было няпроста: многія  юнакі паказалі вельмі блізкія секунды. Таму было прынята рашэнне правесці яшчэ адзін, і ўжо па выніках двух этапаў вызначыць пераможцаў.

Першае месца прысуджана Аляксандру Баслыку, другое — Ільі Мацешу (юнакі — вучні СШ № 1), трэцяе — Юрыю Рабеку з прафтэхкаледжа. Навучэнка гэтай жа ўстановы адукацыі Вольга Коваль таксама заахвочана сувенірам — яна была адзінай дзяўчынай-удзельніцай спаборніцтваў.

Іна СНЯЖКОВА.

Фота аўтара.