Большая семья — большое счастье (+фото)

25 красавіка ў Глыбокім адбыўся паўфінал абласнога агляду-конкурсу “Лепшая мнагадзетная сям’я Віцебшчыны”. Разам з гаспадарамі ў ім прынялі ўдзел прадстаўнікі Ушацкага, Шаркаўшчынскага, Браслаўскага, Верхнядзвінскага, Докшыцкага і Пастаўскага раёнаў. З вялікім поспехам выступіла сям’я Чайкоўскіх з гарадскога пасёлка Варапаева. У Глыбокае Іна, Аляксандр і іх дзеці прыехалі ў рангу пераможцаў раённага этапа агляду-конкурсу. І зноў выступілі ўдала. Разам з мнагадзетнымі сем’ямі з Глыбокага і Браслава яны заваявалі пуцёўку ў фінальную частку абласнога агляду-конкурсу, які пройдзе 24 мая ў Віцебску.

Правядзенне вясеннім часам конкурсу на лепшую мнагадзетную сям’ю на Пастаўшчыне стала яшчэ адной добрай традыцыяй. Яго заснавальнікамі і аргані­затарамі з’яўляюцца ўпраўленне па працы, занятасці і сацыяльнай абароне насельніцтва, аддзелы культуры і па справах моладзі райвыканкама, райкамы прафсаюза работнікаў аграпрамысловага комплексу і дзяржаўных устаноў, раённыя арганізацыі грамадскіх аб’яднанняў “Белая Русь” і “Беларускі саюз жанчын”. Такое прадстаўніцтва сведчыць аб значнасці мерапрыемства. А тое, што ў конкурсе ўдзельнічаюць сапраўды самыя дружныя, самыя моцныя і таленавітыя сем’і  Пастаўшчыны, даказалі і сёлетнія ўдзельнікі.

Вітаючы іх, намеснік старшыні райвыканкама, старшыня журы Юрый Кісялёў адзначыў, што самае галоўнае шчасце для чалавека — моцная, дружная сям’я, у якой ёсць месца для творчасці, весялосці, усебаковага развіцця дзяцей, дзе пануюць згода, павага, узаемаразуменне. Менавіта такія мнагадзетныя сем’і з’яўляюцца нашым гонарам, а іх удзел у конкурсе служыць справе папулярызацыі сямейных каштоўнасцей.

Дастойных сем’яў шмат. Але не кожная адважыцца выйсці на сцэну і адкрыта расказаць пра свае пачуцці, захапленні, сакрэты сямейнага жыцця, прадэманстраваць здольнасці, выступіць адной камандай. Такімі павінны былі паўстаць дарослыя і дзеці, прымаючы ўдзел у конкурсах “Добры дзень, гэта мы!”,  “Нашы ручкі залатыя”, “Смачна, пальчыкі абліжаш”, у сацыяльнай рэкламе пад назвай “Мы — сям’я!”. Сёлетнім удзельнікам конкурсу хапіла смеласці і знаходлівасці, творчасці і весялосці.

Менавіта такой паўстала перад членамі журы і гледачамі сям’я Чайкоўскіх з гарадскога пасёлка Варапаева. Аляксандр працуе майстрам арматурнага цэха завода жалезабетонных вырабаў, Іна — прадаўцом магазіна “Дары прыроды” філіяла “Каапнарыхтпрамгандаль райспажыўтаварыства”. У сям’і трое дзяцей: Аляксей, Андрэй і Руслан. Да конкурсу Чайкоўскія падрыхтаваліся грунтоўна і паказалі, на што здольна сям’я, у якой усе сябруюць з песнямі, танцамі, музыкай, жартамі, дзе гатуюць такія смачныя стравы, што сапраўды пальчыкі абліжаш. А дырыжорам мужчынскага квартэта выступаў самы дарагі чалавек — жонка і маці. Іна Уладзіміраўна з вялікай любоўю і ўдзячнасцю гаварыла пра сваіх мужчын, на якіх многае трымаецца ў доме, з якімі можна вырашыць любую справу. А тыя, у сваю чаргу, схіляліся перад залатымі ручкамі адзі­най у сям’і жанчыны.

У суправаджэнні сыночкаў Арцёма, Алега і Ільі выйшла на сцэну культработнік Алена Ліпік з вёскі Мольдзевічы Ярэўскага сельсавета. Ліпікі, нягледзячы на адсутнасць гаспадара (на тое была ўважлівая прычына),  не разгубіліся, прэзентавалі сябе як мае быць, накрылі арыгінальную выставу-стол. ­Сям’я трымае вялікую гаспадарку, мае дагледжаны дом, а гаспадыня з’яўляецца, да таго ж,  старэйшынай вёскі. Алена Мікалаеўна паведаміла (ды гэта ўжо і бачна), што ў сям’і неўзабаве чакаецца папаўненне. Такім чынам, магчыма, што ў наступны раз Ліпікі выйдуць на сцэну большым складам.

З выкарыстаннем сучасных відэасродкаў прэзентавала і рэкламавала сябе сям’я Смірновых з Пастаў. І гэта невыпадкова: Сяргей творчы, таленавіты чалавек, працуе інжынерам відэамантажу Пастаўскага тэлебачання. Жонка Вольга — супрацоўніца філіяла “Беларусбанка”, цяпер у водпуску па доглядзе меншай, Сафійкі. У сям’і падрастаюць яшчэ Анжаліка і Глеб. Смірновы інтэлігентныя, ва ўсім абавязковыя людзі. Зараз яны будуюць уласны дом.

Для сям’і Мішутаў з Ваўкоў выхад на раённую сцэну стаў першым публічным выступленнем.  Сяргей працуе лесніком ў мясцовым лясніцтве, Таццяна — прадавец. Іх гонар і найвялікшая каштоўнасць — дзеці Валерыя, Вераніка і Уладзіслаў. Мішуты ўразілі шчодрай выставай-сталом, уласнымі вырабамі, не разгубіліся яны  і на сцэне.

Мнагадзетныя сем’і, якія прынялі ўдзел у конкурсе, не падобныя адна на другую як у жыцці, так і на сцэне. Але ёсць у іх і агульнае  перакананне: шчаслівым і багатым духоўна і фізічна можна быць толькі ў вялікай сям’і.

Усе  выступілі годна. Але конкурс ёсць конкурс. Журы прызнала яго пераможцам сям’ю Чайкоўскіх, другое і трэцяе месца занялі, адпаведна, Мішуты і Смірновы. Яны атрымалі дыпломы і наборы сучаснай электрабытавой тэхнікі. Не засталіся без прыза і Ліпікі.

Тэкст і фота Пятра КУРЫЛОВІЧА.