«Поставы-ТВ» — лучшее телевидение Витебщины

У конкурсе друкаваных сродкаў масавай інфармацыі на прэмію імя Ф. Скарыны і электронных СМІ на прэмію “Віцязь”, які на працягу некалькіх гадоў ладзіцца па ініцыятыве Віцебскага абласнога выканаўчага камітэта, у намінацыі «Лепшая студыя тэлебачання (радыёвяшчання)» перамаглі пастаўчане.

— Разам з заяўкай на ўдзел у конкурсе і творчай характарыстыкай калектыву мы адправілі ў Віцебск некалькі сваіх выпускаў навін за люты 2013 года, аўтарскую перадачу Івана Шушкевіча “Генацыд”, літаратурныя перадачы, прысвечаныя жыццю і творчасці нашага земляка мастака А. Ромера, паэтаў Я. Купалы і М. Багдановіча, а таксама выпуск медыцынскай старонкі з удзелам работнікаў раённага цэнтра гігіены і эпідэміялогіі і цэнтральнай райбальніцы. І нядаўна атрымалі вестку пра тое, што нам прысуджана першае месца, — паведаміла галоўны рэдактар “Паставы-ТБ” Людміла Зелянкевіч.

Раённае тэлебачанне існуе ў Паставах ужо шосты год. За гэты час яно паспела не толькі заваяваць немалую глядацкую аўдыторыю (праўда, пакуль пераважна з ліку гара­джан, бо вяшчанне тэлеканала ажыццяўляецца выключна ў кабельных сетках), але і гучна заявіць пра сябе ў рэспубліцы. Двойчы маладая правінцыйная тэлестудыя станавілася прызёрам Нацыянальнага тэлевізійнага конкурсу “Тэлевяршыня”: у 2009 годзе заняла трэцяе месца ў намінацыі “Лепшы рэгіянальны прадукт года”, у 2010-ым — другое месца ў намінацыі “Лепшая праграма аб навінах рэгіянальнага тэлебачання”. Наступны год прынёс перамогу ў рэспубліканскім творчым конкурсе сярод друкаваных і электронных СМІ “Моцная сям’я — моцная дзяржава”. І вось чарговая адзнака працы пастаўскіх тэлевізіёншчыкаў, якая стала для іх прыемным падарункам да прафесійнага свята.

Па ўмовах конкурсу, акрамя дыплома, невялікаму, але вельмі творчаму калектыву рэдакцыі “Паставы-ТБ” належыць грашовая прэмія ў памеры 150 базавых велічынь. Уручэнне гэтых узнагарод адбудзецца ва ўрачыстай абстаноўцы ў Віцебску напярэдадні Дня работнікаў радыё, тэлебачання і сувязі.

Алена ШАПАВАЛАВА.